​O‘ZBEKISTON XALQ SHOIRI SHARIFA SALIMOVA

   O‘zbek adabiyoti va madaniyati og‘ir judolikka uchradi. Zamonaviy she’riyatimizning taniqli namoyandalaridan biri, serqirra ijodkor, jamoat arbobi, O‘zbekiston xalq shoiri Sharifa Salimova shu yil 5-avgust kuni 75 yoshida vafot etdi.

   Sharifa Salimova Vatanga muhabbat, milliy g‘urur va iftixor, vafo va sadoqat, matonat va jasorat kabi ezgu fazilatlarni tarannum etib, jamiyatimiz hayotidagi dolzarb ma’naviy-ma’rifiy masalalarga, oila va yoshlar tarbiyasiga bag‘ishlangan ko‘plab asarlari, ijtimoiy faoliyati bilan el-yurtimiz o‘rtasida munosib obro‘ topgan ijodkor edi.

   O‘zining 50 yildan ziyod hayotini o‘zbek madaniyati ravnaqiga bag‘ishlagan ustoz shoiramiz o‘tgan asrning 70-yillarida o‘ziga xos betakror ovozi, samimiy, nafis she’rlari bilan adabiyotga kirib keldi. Ayol qalbining go‘zalligi yorqin badiiy obrazlar, poetik tasvirlar orqali teran aks ettirilgan, o‘tkir ijtimoiy muammolar tahlil qilingan “Hayot zavqi”, “Mening bahorim” kabi dastlabki she’riy to‘plamlari adabiy jamoatchilik va kitobxonlar tomonidan ijobiy baholandi.  

Ijodkorning “Xizr bulog‘i, “Yetti oqqush”, “Giyohlar bilan tillashgan inson”, “Ayolga ehtirom”, “Tongga qasam”, “Diydor saodati”, “Olimlik va odamiylik”, “Vatan suvrati”, “Vafoning iffat yo‘li”, “Bedor tun tomchilari” kabi she’riy va publitsistik asarlari adabiyotimiz rivojiga munosib hissa bo‘lib qo‘shildi.

   Ayni vaqtda shoira mashhur xonanda va sozandalar bilan hamkorlikda o‘nlab ta’sirchan qo‘shiqlar ham yaratdi. Ana shunday ijodiy hamkorlik natijasi bo‘lgan “Qaddingni tik tut, ayol!”, “Vatan”, “Ona nidosi”, “Davlatli sultonim mening”, “Dunyo”, “Onajon tilim”, “Sendan bir dam ayro tushmaymiz, Vatan!” singari musiqiy taronalar san’atimiz xazinasi va muxlislar qalbidan chuqur joy oldi.

   Sharifa Salimovaning ijodiy merosida tarixiy mavzu alohida o‘rin tutadi. Ayniqsa, Yangi O‘zbekiston davridagi keng ko‘lamli islohotlar tufayli tariximizning ilgari yopiq bo‘lgan sahifalarini o‘rganish uchun keng imkoniyatlar ochilgani ijodkorni yana-da ilhomlantirdi.

   Bu matonatli inson keyingi yillarda og‘ir xastalikni boshidan kechirganiga qaramasdan, adabiy faoliyatini qizg‘in davom ettirdi. O‘tgan asrning 20-yillarida, tahlikali bir sharoitda olis Germaniyaga borib o‘qigan va mustabid tuzum davrida qatag‘on qilingan o‘zbek ayollari taqdiriga bag‘ishlab, 2024-yilda “Qabohat saltanati yoxud qor qo‘ynida lolalar” deb nomlangan epik ko‘lamli she’riy roman yaratdi. O‘zbek adabiyotida ushbu mavzudagi birinchi yirik manzuma bo‘lgan bu asar nafaqat shoira ijodida, balki adabiyotimiz tadrijida vatanparvarlik yo‘nalishining yuksak namunasi sifatida e’tirof etildi.  

Ijodkor mamlakatimiz ijtimoiy-siyosiy hayotida ham faol ishtirok etdi. U 1999–2009-yillarda Oliy Majlis deputati, Oila va ayollar muammolari komissiyasi raisi kabi mas’uliyatli lavozimlarda samarali faoliyat ko‘rsatdi. O‘zbekiston Yozuvchilar uyushmasining tajribali va jonkuyar a’zosi sifatida yosh ijodkorlarni qo‘llab-quvvatlash, ijodkorlarning yangi asarlarini targ‘ib etish, joylarda o‘tkaziladigan adabiy-ma’rifiy uchrashuvlarda, xususan, Zomin va Do‘rmon yoshlar seminarlari doirasidagi tadbirlarda doimo faollik ko‘rsatib keldi.  

Sharifa Salimovaning mamlakatimizda adabiyot va madaniyatni ravnaq toptirish borasidagi xizmatlari davlatimiz tomonidan munosib taqdirlandi. U “O‘zbekiston xalq shoiri”, “O‘zbekiston Respublikasida xizmat ko‘rsatgan madaniyat xodimi” faxriy unvonlari va “Mehnat shuhrati” ordeni bilan taqdirlangan edi.  

Hassos shoira, taniqli jamoat arbobi, yoshlarning mehribon ustozi, kamtarin va samimiy inson Sharifa Salimovaning yorqin xotirasi qalblarimizda hamisha saqlanib qoladi.