BMT Bosh Assambleyasi O‘zbekiston Prezidenti tashabbusi asosidagi rezolyusiyani qabul qildi

BMT Bosh Assambleyasi Nyu-York shahrida bo‘lib o‘tgan yig‘ilishda «Ijtimoiy rivojlanishni jadallashtirishda parlamentlarning rolini kuchaytirish to‘g‘risida»gi rezolyusiyani a’zo davlatlarning mutlaq ko‘pchilik ovozi bilan qabul qildi.

Mazkur tashabbus ilk bor O‘zbekiston Prezidenti Shavkat Mirziyoyev tomonidan 2020-yil sentyabr oyida BMT Bosh Assambleyasining 75-sessiyasidagi nutqida ilgari surilgan edi. Keyingi yillarda O‘zbekiston diplomatiyasining sa’y-harakatlari natijasida ushbu g‘oya xalqaro hujjat shakliga keltirildi.

Rezolyusiyada Toshkent shahrida o‘tkazilgan Parlamentlararo Ittifoqning 150-Assambleyasi va uning yakunlari bo‘yicha qabul qilingan Toshkent deklaratsiyasi e’tirof etilgan. Shuningdek, hujjatda parlamentlar faoliyatida ayollar va yoshlar ishtirokini kengaytirish, rivojlanayotgan mamlakatlarni qo‘llab-quvvatlash hamda ijtimoiy sohadagi xalqaro hamkorlikni mustahkamlash masalalariga alohida e’tibor qaratilgan.

Rezolyusiya uchun o‘tkazilgan ovoz berishda 167 ta davlat uni qo‘llab-quvvatladi. Hujjatning hammualliflari qatoridan 61 ta davlat o‘rin oldi. Ular orasida Avstriya, Germaniya, Xitoy, Yaponiya, Janubiy Koreya, Braziliya va Ispaniya kabi mamlakatlar ham bor.

Rasmiylarga ko‘ra, rezolyusiyaning qabul qilinishi O‘zbekiston tomonidan ilgari surilgan xalqaro tashabbuslarning BMT doirasida qo‘llab-quvvatlanayotgani va mamlakatning xalqaro hamkorlikdagi faolligini namoyon etadi.