Xitoyning “Samarqand-2028” sun’iy yo‘ldoshi orbitaga uchirildi

Bugun, 5-avgust kuni STAR.VISION kompaniyasi tomonidan Xitoyning Shandun provinsiyasi qirg‘oqlari yaqinidagi dengiz start platformasidan “Samarqand-2028” va “Lampung-1” giperspektral sun’iy yo‘ldoshlari muvaffaqiyatli orbitaga uchirildi. Bu haqda Raqamli texnologiyalar vazirligi ma’lum qildi.

Mazkur loyiha O‘zbekiston tarixidagi eng yirik xalqaro kosmik tashabbuslardan biri bo‘lib, mamlakat milliy kosmik dasturi rivojida yangi bosqichni boshlab berdi. Shuningdek, loyiha O‘zbekiston va Xitoy o‘rtasidagi ilmiy-texnologik hamkorlikni yanada mustahkamlashga xizmat qiladi.

Loyiha doirasida “O‘zbekkosmos” agentligi mutaxassislari sun’iy yo‘ldosh borti uchun maxsus sun’iy intellekt modulini ishlab chiqdi. Ushbu texnologiya giperspektral ma’lumotlarni bevosita orbitada qayta ishlash imkonini berib, ma’lumotlarni uzatish va tahlil qilish samaradorligini sezilarli darajada oshiradi.

Vazirlik ma’lumotiga ko‘ra, “Samarqand-2028” missiyasi qishloq xo‘jaligi, ekologiya, tabiiy resurslarni monitoring qilish, suv resurslarini boshqarish, favqulodda vaziyatlarni kuzatish, shaharsozlik hamda boshqa yo‘nalishlarda kosmik texnologiyalardan samarali foydalanish imkoniyatlarini kengaytiradi.

Sun’iy yo‘ldoshga “Samarqand-2028” nomi berilishi ham ramziy ma’noga ega. Ushbu nom 2025-yilda Sidney shahrida bo‘lib o‘tgan Xalqaro astronavtika kongressida qabul qilingan qarorga ko‘ra, 2028-yilgi kongress Samarqand shahrida o‘tkazilishi belgilanganiga ishora qiladi.

Raqamli texnologiyalar vazirligi ta’kidlashicha, mazkur loyiha O‘zbekistonning jahon kosmik hamjamiyatidagi ishtirokini kengaytirish, milliy muhandislik salohiyatini rivojlantirish hamda sun’iy intellekt va kosmik texnologiyalar yo‘nalishida xalqaro hamkorlikni yangi bosqichga olib chiqishda muhim ahamiyat kasb etadi.