Buxoroda qidiruvga berilgan qashqadaryolik gumonlanuvchi Toshkentda qo‘lga olindi

Ijtimoiy tarmoqlarda “Apple Nasiya” va “Halol Nasiya Savdo” nomlari ostida faoliyat yuritgan shaxs Toshkent shahrida qo‘lga olindi. Bu haqda Buxoro viloyati Ichki ishlar boshqarmasi ma’lum qildi.

Ma’lumotlarga ko‘ra, Qashqadaryo viloyatining Kitob tumanida tug‘ilgan R.Q. axborot texnologiyalaridan foydalangan holda firibgarlik sodir etganlikda gumon qilinmoqda. Tezkor-qidiruv tadbirlari davomida u Toshkent shahrining Uchtepa tumanida yashirinib yurgan vaqtida ushlangan.

Tekshiruv chog‘ida gumonlanuvchidan olingan Redmi 12 Pro rusumli mobil telefonda “Apple Nasiya” va “Halol Nasiya Savdo” nomli profillar aniqlanib, ular ashyoviy dalil sifatida rasmiylashtirilgan.

Dastlabki ma’lumotlarga ko‘ra, mazkur profillar orqali 50 ga yaqin fuqaro firibgarlik qurboni bo‘lgan bo‘lishi mumkin.

Holat yuzasidan gumonlanuvchiga nisbatan Jinoyat kodeksining 168-moddasi 3-qismi (firibgarlik) bilan jinoyat ishi qo‘zg‘atilgan. Tergovdan yashiringani sababli u avvalroq qidiruvga berilgan va sud tomonidan qamoqqa olish ehtiyot chorasi qo‘llangan.

Hozirda tergov harakatlari davom etmoqda. Huquqni muhofaza qiluvchi organlar ushbu shaxsning boshqa ehtimoliy jabrlanuvchilarini ham aniqlamoqda.