Jahon sog‘liqni saqlash tashkiloti rasmiy vakili Margaret Harris odam metapnevmovirusiga (HMPV) oid mavjud ma’lumotlar bilan bo‘lishdi.

Harris Xitoyda qayd etilgan respirator infeksiyalar darajasi qish mavsumi uchun odatiy diapazonda ekanini ta’kidlagan. Ma’lum qilinishicha, shifoxonalarning bemorlar bilan to‘lganlik darajasi o‘tgan yilning shu davriga nisbatan solishtirganda ancha past ko‘rsatgichda. Hozircha favqulodda vaziyat haqida biror-bir murojaat yoki javob choralari haqida ma’lumot kelib tushmagan.

JSST metapnevmovirus yangi virus emasligini ta’kidlamoqda. U dastlab, 2001-yilda aniqlangan, qishda va bahorda aylanib yuradigan keng tarqalgan viruslar qatoriga kiradi. Odatda, u shamollashga o‘xshash respirator alomatlarni keltirib chiqaradi. Ba’zi hollarda bu bronxit yoki pnevmoniya kabi og‘irroq kasalliklarga olib kelishi mumkin. Yosh va keksalar, shuningdek, immuniteti zaiflashgan insonlar virusning asosiy “o‘lja”si hisoblanadi.

• JSST
• Virus
• Xitoy