Bugun, 27 may kuni Yevroosiyo iqtisodiy ittifoqi davlat rahbarlari, YeOIIda kuzatuvchi davlatlar – Kuba va O‘zbekiston prezidentlari hamda Yevroosiyo iqtisodiy komissiyasi hayʼati raisi Mixail Myasnikovich ishtirokida Oliy Yevroosiyo iqtisodiy kengashining videokonferensiya shaklida yig‘ilishi bo‘lib o‘tdi.

Mazkur tadbirda kuzatuvchi davlat vakili sifatida ishtirok etgan O‘zbekiston Prezidenti Shavkat Mirziyoyevga ham so‘z berildi.

Mirziyoyev mazkur tashkilot bilan O‘zbekiston kuzatuvchi sifatida hamkorlik aloqalarini davom ettirayotganini, mamlakt YeOII bilan hamkorlikni rivojlantirish tarafdori ekanini taʼkidladi.

Shuningdek, O‘zbekiston rahbari qator takliflarni ham ilgari surdi. Jumladan, YeOII doirasida qishloq xo‘jaligi sohasida hamkorlik dasturini ishlab chiqish, tashkilotga aʼzo va kuzatuvchi davlatlarda ishchi kuchini jalb qilish sohasidagi tartiblarni soddalashtirish hamda aʼzo va kuzatuvchi davlatlarda yo‘lovchi tashishni to‘liq tiklash masalasini ishlab chiqishni taklif qildi.

Mirziyoyev, shuningdek, YeOIIga kuzda O‘zbekistonda turizm sohasini rivojlantirish bo‘yicha forum o‘tkazishni taklif qildi.

O‘zbekiston Prezidenti o‘z nutqida istiqboldagi iqtisodiy rejalar haqida ham to‘xtalib, logistika masalasiga ham to‘xtaldi.  

– O‘zbekiston yaqin kelajakda Qirg‘iziston va Xitoy bilan temir yo‘l qurish loyihasini ishga tushirishni rejalashtirmoqda.

O‘zbekiston Janubiy Osiyo bozoriga eng qisqa muddatda chiqish uchun Transafg‘on temir yo‘li qurilishida YeOII bilan hamkorlik qilishga tayyor, – dedi Mirziyoyev.

Shuningdek, davlat rahbari oziq-ovqat va xom ashyo eksportiga qo‘yilgan taqiqlarning O‘zbekistonga taʼsiri bo‘lmasligiga ishonishini taʼkidladi.

• Mirziyoyev
• Prezident
• YeOII