Misrning Gebel al-Xaridiy hududida qazishma ishlarini olib borgan arxeologlar bu yerdan qadimgi ibodatxona qoldiqlarini topdilar. Tarixshunoslar uning ellinizm davrida iloha Isidaga bagʻishlab barpo etilganini aniqlashgan. Bu haqida Misrning Qadimiy buyumlar va turizm vazirligi xabar berdi.

Bino xarobalarining oʻlchami 33 x 15 metrni tashkil qiladi. Ibodatxonaning toʻrtburchak shakldagi zali va bir nechta ustunlari bugungi kunga qadar saqlanib qolgan. Arxeologlarning fikriga koʻra, ushbu ibodatxona Ptolemey III hukmronligi davrida (eramizdan avvalgi 246/245-222/221 yillar) qurilgan.

Isida – qadimgi Misrda Osiris haqidagi afsona qahramonlaridan biri boʻlgan. Misrliklar u Osirisni tiriltirgani, hayot va sehr ilohasi ekanligiga ishonganlar.

Qazishma ishlari davomida ibodatxona yonidan 85 ta qabr topilgan, ularning ayrimlari oddiy qabrlardan farq qilmasa, ayrimlari bir necha qavatli yoʻlaklar tizimiga ega ekanligi bilan tarixchilarni hayratga solgan.

Qabrlarning yonidan marhumlarning ismi, ularning yoshi, sulolasi va ota-onasining ismlari yozilgan qogʻozlar ham chiqqan. Olimlar ayni vaqtda qoʻlga kiritilgan tarixiy buyumlarni yanada chuqurroq oʻrganmoqdalar.

• Tarix
• qiziqarli