Ma’lumotlarga ko‘ra, Moskva temiryo‘llariga qarashli Kuryanovo stansiyasida poyezd ostiga yiqilib tushgan yigitcha omon qolgan va hozir tuzalmoqda. Bu haqda TASS xabar bermoqda.

Ijtimoiy tarmoqlarda tarqalgan xabarlarga ko‘ra, do‘stlari bilan Kuryanovo bekati platformasida “yigit hazil-huzul qilayotgan vaqtda sirpanib ketgan va poyezd ostiga yiqilib tushib, vafot etgani” aytilgan edi.

“2005-yilda tug‘ilgan jabrlanuvchi Inozemsev nomidagi kasalxonaga yotqizilgan. Uning oyoqlari va tos suyaklari singan. Uning holati barqaror”, – degan agentlikning shifoxonadagi suhbatdoshi.

Moskva temiryo‘llari korxonasi TASSga voqea chindan ham sodir bo‘lganini tasdiqlagan.

“MTY fuqarolarga temiryo‘l infratuzilmasida xavfsiz yurish-turish qoidalariga qat’iy amal qilishni so‘raydi”, – degan Moskva temiryo‘llari korxonasi matbuot xizmati xodimi.

O‘zbekistonlik ayrim blogerlar jabrlangan fuqaro 2004-yilda Qashqadaryo viloyatida tug‘ilgan, O‘zbekiston fuqarosi bo‘lmish maktab o‘quvchisi ekani va u olingan jarohatlardan vafot etgani haqida shoshilinch xabar tarqatgan. O‘zbekistonlik mehnat migrantlari turli guruhlarda marhumning jasadini O‘zbekistonga qaytarish uchun pul to‘plashayotgani, O‘zbekistonning Rossiyadagi elchixonasi vaziyat bo‘yicha munosabat bildirmaganini yozishgan. Biroq poyezd ostiga yiqilgan o‘quvchining O‘zbekiston fuqarosi ekani to‘g‘risidagi iddao rasman tasdiqlanmagan.

• Favqulodda holat
• Poyezd
• Rossiya