Biz ishda, munosabatlarda, yumushlarda va hayotning boshqa jabhalarida niyatimizga yetkazuvchi muvaffaqiyat formulasini izlaymiz. Biroq hamma vaqt ham istagimiz eshiklarini ochib beradigan kalitni topolmaymiz. Hayotda muvaffaqiyat formulasini topish mumkinmi?

Qanday qilsak niyatimizga tez erishamiz?
Muvaffaqiyatni odamning ayni vaqtdagi holati bilan oʻlchab boʻlmaydi. Muvaffaqiyat – bosib oʻtilgan yoʻl va unda uchragan toʻsiqlarni qay yoʻsinda yengib oʻta olingani bilan aniqlanadi. Muvaffaqiyat – inja orzularning amalga oshirilishi, asosiy maqsadning hayotga tadbiq qilinishi bilan belgilanadi. Istaklarni amalga oshirishning esa juda koʻp usullari mavjud. Shunchaki oʻtirib, omad kelishini kutish ham mumkin. Biroq eng tez va samarali usuli donolarcha fikrlab, sovuqqonlik bilan harakat qilishdir. Omad kelishiga umid qiling. Oʻzgarishlar hamma vaqt xavotirga soladi. Biroq sizning hayotingizni oʻzingizdan boshqa hech kim oʻzgartira olmaydi. Istalgan narsaga qanday erishish mumkin? Orzularni qanday amalga oshirish mumkin?

Muvaffaqiyat formulasi. Omad sari 10 qadam
“Boshqalar uxlayotganda oʻrganing, boshqalar dam olayotganda ishlang, boshqalar boʻshashganda tayyor turing va boshqalar taslim boʻlganida orzularga beriling”.

Ingliz shaxmatchisi Uilyam Artur Uord.

Muvaffaqiyat bir yoki ikki omilni bajarishga bogʻliq emas. Muvaffaqiyat barcha 10 ta oʻzgarishni amalga oshirishga bogʻliq. Agar siz ularning ayrimlariga amal qilib, qolganlariga eʼtibor bermayotgan boʻlsangiz, hech qachon muvaffaqiyatga erisha olmaysiz. Muvaffaqiyat oʻzgarishlarning oʻziga emas, ularni koʻpaytirishga teng. Matematikani eslang. Har qanaqa katta sonni nolga koʻpaytirsangiz ham baribir natija nolga teng boʻladi. Agar formuladagi biror punkt nolga teng boʻlsa, bilingki muvaffaqiyat ham nolga teng boʻladi.

1. Ustuvor vazifalarni ilgari suring
Hayotiy ustuvor vazifalarni toʻgʻri tartiblash juda ham muhim. Bizning kuchimiz, manbalarimiz va vaqtimiz cheklangan. Agar uni zarur narsalarga sarflab, toʻgʻri taqsimlay olsak, niyatimizga yeta olamiz. Agar oʻz hayotiy imkoniyatlarimizni befoyda va mayda narsalarga ishlatsak, koʻp narsani yoʻqotamiz. Agar sizni ayni hayotiy haqiqat qanoatlantirmayotgan boʻlsa, demak siz oʻz imkoniyatlaringizni notoʻgʻri rejalagansiz. Koʻzlangan niyatga yetishmoq uchun nima qilish kerak? Maqsadga yetish uchun har bir kunni nimadan boshlash lozim? Qanday ish bilan mashgʻul boʻlish va qaysisidan qochish kerak boʻladi? Dastlab nimani istashingizni tushunib oling, ana undan keyin uni birinchi oʻringa qoʻying.

2. Reja va strategiya ishlab chiqing
Biz rejasiz juda ham noaniq va besamar harakat qilamiz. Bir ishga kirishamiz, uni tashlab ikkinchisiga oʻtamiz, uchinchisi haqida fikrlaymiz. Xuddi Ivan Andreyevich Krelovning “Oqqush, choʻrtan baliq va qisqichbaqa” haqidagi masaliga oʻxshaydi, shundaymasmi? Oʻz-oʻzingizga savol bering: orzularim va maqsadlarim qanday oʻzi? Oʻz hayotimni 5,10 yoki 15 yildan keyin qanday tasavvur qilaman? Shu asosda nimalar qilish kerakligini atroflicha oʻylab, hayotingizga taalluqli qisqa muddatli va uzoqni koʻzlagan rejalar tuzing. Rejada 5-10 yillik maqsadlaringizni akslantiring. Undan keyin bu yilga, ayni shu oyga va keyingi haftaga reja qilib oling. Aynan yozma tarzda boʻlsin. Hammasi aniq va ravshan koʻrinayotgani oʻzingizni ham ajablantiradi. Maqsadlar bir-birini toʻldiradi. Siz uchun har kun nima qilish kerakligi ancha tushunarli boʻlib qoladi. Bu kundalik uncha katta boʻlmagan harakatlar juda ham zarur ulkan natijani yetaklab keladi. Hamma vaqt reja tuzing. Hatto bir kunga ham. Shu tariqa oʻz ish unumingizni oshirasiz va rejalangan hamma vazifani amalga oshirishga ulgurasiz. Bu muvaffaqiyat formulasining muhim qoidasi.

3. Hayotingizni imkoniyatlar bilan toʻldiring
Yaxshi imkoniyatlarni kutib oʻtirmasdan, hayotingizni oʻzingiz imkoniyatlar bilan toʻldiring. Moʻjiza kutmang, aksincha, oʻzingiz moʻjiza yarating. Lotereyadan katta yutuq kutmang, xazina qidiring. Harakat va omad oʻrtasida mustahkam aloqa mavjud. Imkoniyatlar biz ularni qabul qilishga tayyor boʻlgan vaqtimizda keladi. Uyda oʻtirmasdan odamlar bilan koʻp muloqot qilayotganimizda, yangi joylarga borib, qiziqroq narsalarni koʻrganimizda, tavakkal qilishdan qoʻrqmaganimizda paydo boʻladi bu imkoniyat. Oʻzingiz sayohatga chiqmaguningizcha moʻjizalarni koʻrolmaysiz. Imkoniyatlar yoʻlning navbatdagi burilishidan boshlanadi.

4. Intizomli boʻling
Biz ijtimoiy tarmoqlarni, seriallarni, kompyuter oʻyinlarini, spirtli ichimliklarni, yalpayib yotishni, vaqtni maqsadsiz oʻtkazishni yoqtiramiz. Bularning hammasi vaqtimiz hamda kuchimizni oladi. Aynan oʻsha bekor ketgan vaqt va kuchimizni ancha foydali ishga sarflashimiz mumkin edi-ku. Ishlaringizga vaqtingiz yoʻqmi? Biroq internet, ijtimoiy tarmoqlar va boshqa bemaʼniliklarga vaqt topasiz. Dam olish va oʻyin-kulgini eng kam miqdorgacha kamaytiring va muhim ishlar bilan shugʻullaning. Intizom va tartib harbiylarning soʻziga oʻxshadi. Ammo intizom va tashkil qilmasdan turib ajoyib yutuqlarga erishish mumkin emas. Ichki zaiflikka berilishni bas qiling. Har safar vaqtingizni bekor sarf qilayotganingizda bilingki – siz oʻz orzularingizga xiyonat qilayapsiz!

5. Qatʼiyatli boʻling. Xatolar boʻladi.
“Ayrim odamlar muvaffaqiyatga bir qadam qolganida taslim boʻlishganini hatto tasavvur ham qilishmaydi”.
Amerikalik kashfiyotchi va tadbirkor Tomas Edison.
Xatolarsiz gʻalabalar boʻlmaydi. Muvaffaqiyat formulasi xatolardan qoʻrqmaslikka chaqiradi. Standart xatolardan qochishga harakat qilish lozim, biroq baribir uchraydi. Xatolarsiz olgʻa harakat qilish aslo mumkin emas. Barcha olimlar, biznesmenlar va boshqa kuchli shaxslar ham oʻz vaqtida xatolarga yoʻl qoʻyishgan. Muvaffaqiyatga yoʻl qatʼiyat va xatolardan oʻrganish mahorati orqali oʻtadi. Omadsizlik – bu yakun emas. Kurashni davom ettirish uchun kuch toping. Siz taslim boʻlmaguningizcha oʻyin tugamaydi. Taslim boʻldingizmi, bilingki shaxmat taxtasidagi asosiy maqsadga yetishiga 2 qadam qolgan piyodadek boʻlib qolasiz.

6. Eʼtiborni jamlashni oʻrganing
Shugʻullanayotgan vazifangizga eʼtiboringizni 100 foiz qarating. Xayolingizni chalgʻitadigan narsalarga diqqatingizni boʻlmang. Ishlayapsizmi, ishlang. Birov bilan muloqot qilyapsizmi, muloqot qiling. Sport bilan shugʻullanyapsizmi, shugʻullaning. Agar oʻqiyotgan boʻlsangiz, oʻqing. Dam olayotganda, dam oling. Boshqa narsalarga chalgʻimang. Oʻsha ish bilan band boʻling. Eʼtiborni jamlash – bu samaradorlikka erishtiruvchi va maqsadga eltuvchi ajoyib qurol.

7. Bilim va tajriba orttiring
Dunyo juda tez oʻzgarmoqda. Agar oʻqib-oʻrganib, bilim doirangizni kengaytirib bormasangiz, birpasda orqada qolib ketish hech gap emas. Bill Geyts, Ilon Mask, Mark Sukerberg, Uorren Baffet, Pavel Durov. Ular oddiy kishilarga qaraganda 20-30 marta koʻproq kitob oʻqishadi. Shu boisdan oʻrtacha odamdan ming marta samaraliroq natijani qoʻlga kiritishadi. Doimiy ravishda yangi va qiziq maʼlumotlar bilan tanishib boring. Kitob oʻqing, qiziq videolar koʻring, foydali axborotlarni izlang, har tomonlama rivojlanishga va oʻz sohangizning ustasi boʻlishga, yangi bilimlarni egallab tajriba oshirishga intiling. Miyangizni doimiy ishlashga va bilimlaringizni faollashtirishga majbur qiling.

8. Zarur narsani amalga oshiring
Natijaga erishish uchun bir nuqtaga uring. Charchamang va chalgʻimang. Toʻgʻri ishlarni amalga oshirish bilan niyatingizga yaqinlashib borasiz. Doimiy harakat yangi imkoniyatlarni ochadi va orzuning amaliy roʻyobini koʻrsatadi. Muvaffaqiyat formulasi juda oddiy: ishla, ishla, ishla. Har kun tinmasdan oldinga qarab intiling. 9. Strategiya va rejalaringizni qayta koʻrib chiqing
Agar voqealardan oʻz vaqtida xabardor boʻlib tursangiz, uzoq muddatga va qisqa muddatga moʻljallangan rejalaringiz bir muncha aniq koʻrinadi. Oʻz gʻalabalaringiz va muvaffaqiyatlaringizni tahlil qiling. Harakatingizning nisbatan samarali yoʻllarini izlang. Moslashuvchan va koʻnikuvchan boʻling. Agar nimadir koʻngildagidek chiqmasa, boshqacha yondashuvni toping. Yangilikni qoʻllab koʻring, imkoniyatni qoʻldan chiqarmang, istiqbolni koʻra biling, odamlar bilan muloqot qiling, oʻz imkoniyatlaringizdan unumli foydalaning. Oʻz yoʻnalishingizda doimiy ravishda oʻqib-oʻrganing. Xalaqit beruvchi va eʼtiboringizni tortuvchi hamma narsadan voz keching. Voqelikni tahlil qiling va yondashuvni shakllantiring. Koʻpgina yirik kompaniyalar moslashuvchanlikni yoʻqotib, ogʻir boʻlib qolishganida “sinib” ketishgan. Oʻz maqsadingiz sari olgʻa boring va adashib ketmaslik uchun doimiy ravishda kompasingizga qarab yoʻlingizni aniqlab turing.

10. “Omadga kalit – istakda. U esa hamma vaqt ichimda yonib turadi”. Amerikalik aktyor va rejissyor Al Pachino.
Baxt muhim narsalar oʻrtasidagi muvozanatni topishdadir. Ishga, yumushga, rivojlanishga, oilaga, sportga, uyquga, doʻstlarga, koʻngilli hordiq chiqarishga vaqt ajrating. Oʻzingiz uchun muhim vazifalarni aniqlab olgach, ularni amalga oshirish vaqtini ham belgilab qoʻying. Shu tariqa toliqishdan xalos boʻlasiz. Muvaffaqiyat qozonish istagi kuchayadi. Hayotdan yana-da koʻproq zavq olib, oʻzingizni baxtli va kuchli his qila boshlaysiz. Muvaffaqiyat formulasi quyidagi oʻzgarishlarni amalga oshirib, koʻpaytirishga teng. Agar ulardan biri nolga teng boʻlsa, muvaffaqiyat ham nolga teng boʻladi. Bu sifatlarning 1-2 tasinigina rivojlantirib, muvaffaqiyatga umid qilib boʻlmaydi.

• Ustuvor yoʻnalishlarni belgilash;
• aniq reja asosida harakat;
• imkoniyat va qulay vaziyatni doimiy izlash;
• qatʼiy intizom, tartib va jadval;
• qatʼiyatlilik va magʻlubiyatdan keyin taslim boʻlmaslik;
• vazifalarga jiddiy eʼtibor;
• mustaqil oʻqib-oʻrganish. Bilim va tajriba orttirish;
• har kuni muntazam ravishda oldinga harakat;
• strategiyaga aniqlik kiritish va vaziyat tahlili;
• hayotiy muvozanatni izlash.

Taklif etilgan formulaning barcha jihatlarini eʼtiborga olsangiz, muvaffaqiyatga erishishingiz aniq. Har qanaqa gʻalabaga mashaqqatli mehnat va oʻzingni fido qilish evaziga erishiladi. Yakuniy muvaffaqiyat esa oʻz orzuingizni butun hayotingiz davomida barcha sinovlardan eson-omon oʻtishingizga bogʻliq.

• Foydali
• Tavsiya
• qiziqarli