NASA so‘nggi 30 yil davomida sun’iy yo‘ldosh ma’lumotlarini tahlil qilib, dengiz sathi 1993-yildan beri to‘qqiz santimetrdan ko‘proqqa ko‘tarilganini aniqladi.

Taʼkidlanishicha, soʻnggi oʻttiz yillikda okean sathi 9,1 santimetrga koʻtarilgan, yaʼni suvning koʻtarilish tezligi yiliga qariyb 0,3 santimetrni tashkil etgan.

Olimlar kelajakda bu jarayon tezlashishini va 2050-yilga borib okean yiliga 0,66 santimetrga ko‘tarilishini taxmin qilmoqda.

Okeanlardagi suv global isish tufayli eriyotgan qutb muzliklari hisobiga ko‘tarilmoqda. Okeanlardagi ortiqcha suvning asosiy manbai Grenlandiya muz qatlami bo‘lib, olimlarning fikricha, u qaytib kelmaydigan nuqtaga yaqinlashmoqda.

Mutaxassislarning ta’kidlashicha, joriy asrning o‘rtalariga kelib AQSh qirg‘oqlaridagi suv taxminan 30 santimetrga ko‘tariladi, dunyoning boshqa hududlarida esa vaziyat bundan ham yomonroq bo‘lishi mumkin.

Taxminlarga ko'ra, dunyo bo'ylab 800 millionga yaqin odam majburiy ko'chirilishdan aziyat chekishi mumkin.

Avvalroq olimlar AQSh suv toshqini oqibatida ommaviy migratsiyaga duch kelishini aytishgan edi.

• Global
• Okean
• dengiz
• qiziqarli