Tarixchilar sud-tibbiyot rekonstruksiyasi usulidan foydalangancha miloddan avvalgi VII asrda Misr firʼavnlarining XXVI sulolasi davrida yashagan Shep-en-Isida mumiyosining tashqi koʻrinishini qayta tiklashdi. U 1819-yilda Luksor shahridagi Xatshepsut ibodatxonasining janubiy qismida joylashgan maqbaradan topilgan. 1820-yildan beri avliyo Gall nomidagi shveysar kutubxonasi ibodatxonasida saqlanib kelingan va ushbu mamlakatdagi eng mashhur mumiyo boʻlgan.

Shep-en-Isidaning sarkofagi yonidan uning otasiga Pa-ae-tenfiga tegishli mumiyo ham topilgan. Ayni vaqtda Pa-ae-tenfi mumiyosi Berlinda saqlanadi.

Olimlar Shep-en-Isida mumiyosini oʻrganish davomida uning miloddan avvalgi 650-yilda dunyoga kelgani va miloddan avvalgi 620-610-yillar oraligʻida vafot etganini aniqlashgan.

Ayolning sarkofagidagi yozuvlar Shep-en-Isidaning badavlat oila vakilasi boʻlganidan darak beradi. Taxminlarga koʻra, u Fiva shahrida hayot kechirgan kohinning qizi boʻlgan.

Mumiyoning tashqi koʻrinishini qayta tiklash jarayoni Sitsiliyadagi FAPAB tadqiqot markazi, Avstraliyadagi Flinders universiteti va braziliyalik 3D-dizaynerlar hamkorligida amalga oshirilgan. Olimlar Shep-en-Isidaning chiroyli tashqi koʻrinishga ega boʻlgani, tishlari yaxshi holatda saqlanib qolganini alohida qayd etganlar.

• Tarix
• qiziqarli