Koronavirusning yangi shtammi – omikronning asosiy belgilari COVID-19 belgilaridan anchayin farq qiladi. Bu haqida JAR Tibbiyot uyushmasi raisi Anjelika Kutze maʼlum qildi.

Ekspert omikronni yuqtirib olgan bemorlarda quyidagi belgilar kuzatilganini qayd etgan:

- Kuchli holsizlik;

- Bosh ogʻriqlari;

- Tana haroratining koʻtarilishi (kamdan-kam holatlarda);

- Tomoqdagi ogʻriq (kamdan-kam holatlarda)

“Bundan taxmiman 10 kun avval yonimga kuchli holsizlik, shuningdek bosh ogʻriqlaridan shikoyat qilayotgan bemorlar kela boshlashdi. Ularning bitta yoki ikkitasida tana harorati koʻtarilgan va tomoq ogʻrigan. Ular oʻzlarini yomon his qila boshlaganlaridan keyin oradan 2-3 kun oʻtib yonimga kelishgan. Bemorlarning hech biri koronavirusga chalinganini taxmin ham qilmagan, chunki ularda COVID-19 ga xos odatiy belgilar boʻlmagan”, deydi Kutze. Yaʼni bemorlarda COVID-19 holatida kuzatiladigan hid va taʼm bilish qobiliyatining yoʻqotilishi qayd etilmagan.

Bemorlarning omikron shtammini yuqtirib olingani tasdiqlanganidan keyin umumiy holat baholangan, ularni kasalxonaga yotqizish va qoʻshimcha kislorod berish ehtiyoji yuzaga kelmagan. Bemorlar uy sharoitida davolanganlar va izolyatsiyada boʻlganlar. Shifokorga murojaat qilganlaridan keyin 2-3 kun oʻtib esa oʻzlarini yaxshi his qila boshlaganlar.

Omikron shtammini yuqtirib olishi ehtimoli katta boʻlgan xavf guruhiga kimlar kiradi?

Koronavirusning yangi shtammi 20 yoshdan 30 yoshgacha boʻlgan odamlar va bolalarda koʻproq qayd etilmoqda. Unga chalingan bemorlarning aksariyat qismi koronavirusga qarshi emlanmagan yoki endigina bitta dozani qabul qilgan boʻlib chiqyapti.

• Foydali
• koronavirus
• salomatlik