O‘zbekiston futbol assotsiatsiyasi matbuot xizmati xabar berishicha, O‘zbekiston milliy terma jamoasi bosh murabbiyi Fabio Kannavaro Italiyada reabilitatsiya jarayonini o‘tkazayotgan futbolchilar Jaloliddin Masharipov va Husniddin Aliqulov bilan uchrashib, tiklanish jarayoni qanday kechayotgani bilan tanishdi.

Ma’lumki, Husniddin Aliqulov joriy yilning 19-yanvar kuni “Gyoztepe” bilan o‘yinda jiddiy jarohat olib, maydonni tark etishga majbur bo‘lgan edi.

O‘tkazilgan tekshiruv va tahlillar natijasida Aliqulovning chap tizzasida ACL (oldingi kesishgan bog‘) yirtilishi, Patellar Subluxation (tizza panjasi yarim chiqishi) va buning natijasida MPFL (tizza bog‘i) shikastlanishi, shuningdek ichki va tashqi meniskuslarda yirtilish, qon ketishi va shishish aniqlangan. Aliqulovning maydonga qaytish muddati taxminan 6-9 oy deb baholanmoqda. Shu sabali ham o‘zbekistonlik himoyachi Italiya poytaxti Rim shahrida taniqli jarrohlardan biri Per Paolo Marianini tomonidan operatsiya qilindi.

Shuningdek, terma jamoaning yana bir a’zosi, Eronning “Istiqlol” klubi futbolchisi Jaloliddin Masharipov jarohati sababli jarrohlik amaliyotini boshdan o‘tkazgandi. Hozirda har ikkala futbolchi tiklanish jarayoni o‘tash uchun Italiyada bo‘lib turibdi.

• Futbol
• Italiya
• murabbiy