2025-yil 20-sentyabr kuni O‘zbekiston va Keniya o‘rtasida rasman diplomatik munosabatlar o‘rnatildi. Bu haqda Tashqi ishlar vazirligi matbuot xizmati ma’lum qildi.

Kelishuv O‘zbekiston TIV rahbari Baxtiyor Saidov va Keniya Bosh vaziri, shuningdek, tashqi ishlar va diaspora ishlari vaziri Musaliya Mudavadi o‘rtasidagi uchrashuvda imzolandi. Tomonlar ikki mamlakat o‘rtasidagi rasmiy aloqalarni boshlashni nazarda tutuvchi Kommyunikeni qabul qildi.

Shu tariqa, O‘zbekiston diplomatik aloqalar o‘rnatgan mamlakatlar soni 164 taga yetdi. Saidov Keniyani Afrikadagi eng tez sur’atda rivojlanayotgan iqtisodiyotlardan biri sifatida e’tirof etdi. Uning ta’kidlashicha, bu mamlakat texnologiya va innovatsiyalar sohasida ham mintaqaviy yetakchi hisoblanadi.

Uchrashuv chog‘ida ikki davlat o‘rtasida o‘zaro manfaatli va samarali hamkorlik imkoniyatlari muhokama qilindi. Xususan, ushbu hamkorlik xalqlar manfaatiga xizmat qiluvchi aniq loyihalar bilan boyitilishi mumkinligi qayd etildi.

Keniya rasmiylari ham O‘zbekiston bilan munosabatlarni rivojlantirishda qiziqish bildirishdi. Bu aloqalar savdo, investitsiya, ta’lim, turizm va raqamli texnologiyalar sohalarida yangi istiqbollarga yo‘l ochishi kutilmoqda.

• Keniya
• O‘zbekiston
• diplomatik munosabat