O‘zbekiston va Yaponiya o‘rtasida atrof-muhitni muhofaza qilish sohasida hamkorlik memorandumini imzoladi.

Joriy yil 23-dekabr kuni bo‘lib o‘tgan O‘zbekiston Respublikasi Tashqi ishlar vaziri Vladimir Norov va Yaponiya atrof-muhitni muhofaza qilish vaziri Akixiro Nishimura o‘rtasidagi uchrashuvda ekologiya sohasida ikki mamlakat munosabatlarini yanada faollashtirish istiqbollari muhokama qilindi.

Yaponiya parlamentining O‘zbekiston bilan do‘stlik ligasi a’zosi A.Nishimura mamlakatimizda atrof-muhitni muhofaza qilish, iqlim o‘zgarishiga qarshi kurashish, suv resurslaridan oqilona foydalanish, qayta tiklanadigan energiya manbalarini joriy etish borasida amalga oshirilayotgan chora-tadbirlar natijalaridan hayratda ekanini ma’lum qildi.

“Tomonlar shu yilning oktyabr oyida Toshkent shahrida O‘zbekistonda yashil texnologiyalarni joriy etish va dekarbonizasiyalash jarayonini jadallashtirish maqsadida Yaponiya investisiyasini jalb etishni nazarda tutuvchi “Qo‘shma kreditlash mexanizmi” bo‘yicha hamkorlik to‘g‘risidagi memorandum imzolanganini olqishladilar”, – deyiladi xabarda.

Yaponiya Orol dengizi qurishining oqibatlarini bartaraf etish, jumladan, Orolbo‘yi hududida inson xavfsizligi bo‘yicha ko‘p sheriklik Trast fondi faoliyatida ishtirok etish orqali O‘zbekistonga ko‘mak berishda davom etishga tayyor.

Uchrashuv yakunida O‘zbekiston Respublikasi Ekologiya va atrof-muhitni muhofaza qilish davlat qo‘mitasi va Yaponiya atrof-muhitni muhofaza qilish vazirligi o‘rtasida hamkorlik memorandumi imzolandi.

O‘zbekiston Tashqi ishlar vaziri Vladimir Norov va Yaponiya Atrof-muhitni muhofaza qilish vaziri Akixiro Nishimura imzolagan hujjat milliy, mintaqaviy va global miqyosdagi ekologik muammolarni hal etish va ularga javob berish bo‘yicha ikki mamlakat atrof-muhit agentliklari o‘rtasidagi hamkorlikni kengaytirishga qaratilgan.

• Orol dengizi
• O‘zbekiston
• Tashqi ishlar vazirligi
• Vladimir Norov
• Yaponiya