Namangan viloyati hokimi dunyoning yirik elektron-onlayn savdo giganti Xitoyning Alibaba korporatsiyasi vitse-prezidenti Kris Chjou boshchiligidagi delegatsiyani qabul qildi.

Viloyat rahbari bu hamkorlik har ikki tomon uchun manfaatli ekanini ta’kidlab, mahalliy hokimiyat tomonidan kerakli barcha ko‘mak berilishini ta’kidladi.

“Namangan uch respublikaning yetti viloyati joylashgan, 12 million aholi yashovchi vodiyning qulay nuqtasidadir. Malakali kadrlarimiz, zamonaviy ko‘nikmalarga ega mutaxassislarimiz mavjud. IT-Park ushbu loyihani amalga oshirish uchun qulay joy”, - dedi Shavkatjon Abdurazzoqov.

Alibaba korporatsiyasi vitse-prezidenti Kris Chjou Namanganga bejizga kelishmaganini ta’kidlab, “tekstil, sanoat, IT, qishloq xo‘jaligi mahsulotlari eksportini yo‘lga qo‘yish uchun Namangan mintaqaviy markaz bo‘ladi”, - deya ta’kidladi.

Uchrashuvdan so‘ng viloyat rahbari mehmonlarni mintaqaviy markaz uchun tavsiya etilgan IT-Park Namangan filialidagi bino-inshootlar bilan tanishtirdi.

Eslatib o‘tamiz, Alibaba asoschisi, xitoylik tadbirkor Jek Ma 30-iyun kuni shaxsiy samolyotida O‘zbekistonga kelgandi. Tadbirkorning tashrifidan maqsadi “faqat shaxsiy” bo‘lib, u rasmiylar bilan uchrashmagan va OAV e’tiboridan qochgan.

• Alibaba