O‘zbekistonda 2027-yildan kuchga kiradigan Sog‘liqni saqlash vazirligi buyrug‘i bilan reimbursatsiya dasturi doirasida aholiga bepul beriladigan dori vositalari ro‘yxati tasdiqlandi.

Mazkur ro‘yxat Davlat tibbiy sug‘urta jamg‘armasi bilan kelishilgan bo‘lib, unga onkologik, ruhiy, yurak-qon tomir, endokrin va boshqa kasalliklar kiritilgan. Ushbu kasalliklarni davolash uchun jami 69 turdagi dori vositalari belgilangan. Ular orasida omeprazol, tramadol, ambroksol, kaliy yodid, geparin kabi preparatlar bor.

Reimbursatsiya — bu dori xarajatlarini qoplash tizimi bo‘lib, surunkali kasalliklarga chalingan bemorlar uchun shifokor tomonidan buyurilgan dorilar qiymatini qisman yoki to‘liq qoplashni nazarda tutadi.

Dori olish tartibi qanday?
Dasturga ko‘ra, bemor oilaviy shifokor yozgan elektron retsept asosida Jamg‘arma bilan shartnoma tuzgan dorixonalardan dori vositalarini bepul oladi.

Retsept tasdiqlangach, uning ma’lumotlari tizim orqali dorixonalarga yuboriladi va bemorning telefoniga SMS-xabarnoma keladi. Dorixonaga murojaat qilganda, retsept raqami va SMS orqali yuborilgan maxsus kod taqdim etiladi. Shundan so‘ng, dasturda tasdiqlangan dori vositasi bemorga bepul beriladi.

Qayd etilishicha, ushbu tartib Vazirlar Mahkamasining 2024-yil 2-oktyabrdagi 619-son qaroriga muvofiq amalga oshiriladi.