“Muhofaza etiladigan tabiiy hududlar to‘g‘risida”gi Qonunga muvofiq, Qoraqalpog‘iston Respublikasi, Namangan, Samarqand va Surxondaryo viloyatlari o‘rmon fondi yerlarida “Orolqum”, “Pop”, “Omonqo‘ton”, “Yuqori To‘palang” va “Bobotog‘” milliy bog‘lari tashkil etiladi.

Bu haqda joriy yil 4 martda imzolangan “O‘rmon fondi yerlarida muhofaza etiladigan tabiiy hududlarni tashkil etish bilan bog‘liq qo‘shimcha chora-tadbirlar to‘g‘risida”gi Hukumat qarorida belgilab qo‘yildi.

Hujjatga muvofiq, O‘rmon xo‘jaligi davlat qo‘mitasi milliy tabiat bog‘larining muassisi hisoblanadi.

Milliy tabiat bog‘larining faoliyati Davlat byudjeti mablag‘lari, byudjetdan tashqari mablag‘lar va qonun hujjatlari bilan taqiqlanmagan boshqa manbalar hisobiga moliyalashtiriladi. 

Hujjat bilan “Orolqum”, “Pop”, “Omonqo‘ton”, “Yuqori To‘palang” va “Bobotog‘” milliy bog‘larining yer maydonlari, qo‘riqxona, rekreasiya va xo‘jalik maqsadida foydalaniladigan zonalari uchun ajratiladigan yer maydonlari tasdiqlandi.

Hujjat Qonun hujjatlari milliy ma’lumotlar bazasida e’lon qilingan va 2022-yil 5-martdan kuchga kirgan.

• Hukumat
• O‘rmon
• Qaror
• tabiat