Prezident Shavkat Mirziyoyevga Toshkentni rivojlantirish va transport infratuzilmasini yaxshilash bo‘yicha loyihalar taqdim etildi. 774 gektarlik sanoat zonasining 268 gektarida 800 million dollarlik 28 ta loyiha amalga oshirilmoqda, yana 300 gektarda 400 million dollarlik 30 ta yangi loyiha rejalashtirilgan.

Dubayning “DP World” kompaniyasi bilan hamkorlikda 288 million dollarlik multimodal logistika terminali qurilishi ko‘zda tutilgan. U ishga tushgach, poytaxt va Toshkent viloyati logistika imkoniyatlari kengayadi.

Shuningdek, Shota Rustaveli ko‘chasidagi tajribadan kelib chiqib, “BRT” tizimi asosida yana 10 ta ko‘chada metrobus harakati yo‘lga qo‘yiladi. Yo‘llarda xavfsizlikni ta’minlash va shahar qiyofasini yagona dizayn-kod asosida yangilash choralari ham muhokama qilindi.

Kelgusi yilda mahallalarni obodonlashtirish va sug‘orish tizimlarini yangilash uchun 1 trillion so‘m ajratilishi belgilandi. Prezident yangilanishlar aholi uchun qulay va zamonaviy muhit yaratishga xizmat qilishi lozimligini ta’kidladi.

• Mirziyoyev
• Prezident