ТАСС xabariga ko‘ra, Rossiyaning Tyumen viloyatida migrantlarning ta’lim muassasalarida faoliyat yuritishiga cheklov joriy etilmoqda. Tegishli qaror viloyat gubernatori Aleksandr Mur tomonidan imzolangan.

Rasmiy ma’lumotlarga ko‘ra, ushbu cheklovlar 2026-yildan boshlab kuchga kiradi. Qarorga muvofiq, migrantlarga bolalar bog‘chalari, umumta’lim maktablari, shuningdek, boshlang‘ich, umumiy va o‘rta ta’lim tashkilotlarida ishlash taqiqlanadi.

Bundan tashqari, ish beruvchilarga migrantlarni boshqa bir qator sohalarga jalb etish ham cheklanadi. Xususan, bolalar ovqatlari va boshqa oziq-ovqat mahsulotlarini ishlab chiqarish, ixtisoslashtirilgan do‘konlarda tamaki mahsulotlarining chakana savdosi, shahar va shahar atrofi yo‘lovchi tashish xizmatlari, taksi haydovchisi sifatida ishlash hamda yuk tashish bilan bog‘liq transport xizmatlarida migrantlar mehnatidan foydalanishga ruxsat berilmaydi.

Ta’kidlanishicha, mazkur qaror hududda mehnat bozorini tartibga solish, shuningdek, ijtimoiy sohalarda xavfsizlik va nazoratni kuchaytirishga qaratilgan.

• Mehnat
• Rossiya
• cheklov
• migrant