Oʻzbekistonda mualliflik huquqini buzayotgan saytlarning reyestri yuritiladi. “Intellektual mulk sohasini yanada rivojlantirishga oid qoʻshimcha chora-tadbirlar toʻgʻrisida”gi Prezident qarori qabul qilindi.

Qarorga muvofiq, Davlat bojxona qoʻmitasi Intellektual mulk obyektlarining bojxona reyestriga (Reyestr) kiritilgan tovar belgilari boʻyicha qonunchilik talablari buzilishi haqida xabar beradi.

Intellektual mulk huquqlarini himoya qilish boʻyicha texnik jihatdan tartibga solish va sohadagi qonunchilik talablariga qatʼiy rioya etilishi Texnik jihatdan tartibga solish agentligi va Farmatsevtika tarmogʻini rivojlantirish agentligi tomonidan amalga oshiriladi.

Taʼkidlanishicha, 2022-yil 1-avgustdan quyidagi tekshirish va oʻrganishlar Adliya vazirligining “Sanoat mulki muhofazasi portali”dan foydalangan holda amalga oshiriladi:

• sertifikatsiyalash organlari tomonidan sertifikatlashtirish jarayonidagi qoʻllanilgan nom, qadoqlar va boshqa rekvizitlarda intellektual mulk obyektlariga boʻlgan huquqlarni oʻrganish va tekshirish;
• Farmatsevtika tarmogʻini rivojlantirish agentligi tomonidan dorilar, tibbiy buyumlarni roʻyxatidan oʻtkazishda intellektual mulk obyektlariga boʻlgan huquqlarga rioya etilganligini tekshirish.
• Qarorga koʻra, 2022-yil 1-iyungacha sertifikatsiyalash bilan shugʻullanuvchi barcha organlar “Sanoat mulki muhofazasi portali”ga bepul ulanishi mumkin. 

Qayd etilishicha, 2022-yil 1-sentyabrdan “Yagona darcha” bojxona tizimi orqali intellektual mulk obyektlarini Reyestrga kiritish toʻgʻrisidagi arizalarni elektron yuborish va ariza holatini onlayn kuzatib borish hamda natijasi boʻyicha arizachilarni xabardor qilish tartibi yoʻlga qoʻyiladi.

Maʼlum qilinishicha, 2023-yil 1-yanvargacha intellektual mulk obyektlarining auksion savdosini oʻtkazadigan “Intellektual mulk – barcha uchun” maxsus internet-auksion savdo platformasi ishlab chiqiladi.

Shuningdek, 2022-yil 1-oktyabrgacha Internetda mualliflik huquqi va turdosh huquqlarni buzgan veb-saytlar toʻgʻrisidagi maʼlumotlarni oʻz ichiga oluvchi “Mualliflik va turdosh huquqlar sohasidagi qonunbuzilishlar reyestri” axborot tizimi ishga tushiriladi.

Qaror bilan 2022–2026-yillarda Oʻzbekiston Respublikasida intellektual mulk sohasini rivojlantirish strategiyasi tasdiqlandi.

• Intellektual mulk agentligi
• Prezident
• Qaror
• Shavkat Mirziyoyev