Bizning e’tiqodimiz, umidlarimiz va iymonimiz hayotimizga kuchli ta’sir qiladi. O‘z-o‘zimizga, maqsadlarimizga, orzularimizga va kelajagimizga ishonchimizni yo‘qotganimizda hayotimizni zaharlay boshlaymiz. Nimaga ishonish va nimadan umid qilish mumkin? Hayotni qanday qilib yaxshiliklar sari burish mumkin?   

Kinorejissyor Kventin Tarantino shunday degan edi: “Yo‘l boshida bizga juda kam odam ishongan edi, to‘g‘ri emasmi?”. Agar odam o‘ziga o‘zi  ishonmasa, nima qilishi kerak? Qanday qilib murodiga yetishi va boshqalarni ham bunga ishontirishi mumkin? Ayrim odamlar o‘ylaganlaridan ham aqlliroq va kuchliroq bo‘lishadi. Shunchaki, o‘zlariga ishonishmaydi, xolos. Biz taslim bo‘lganimizda va kelajakka ishonmay qo‘yganimizda o‘z-o‘zimizga xoinlik qilgan bo‘lamiz. Biz taqdir zarbalariga qarshi kurashmasdan, bosh egamiz. Biroq taqdir ojizlarni yoqtirmaydi. Yana-da kuchliroq azoblaydi, qiynaydi, jazolaydi. Shunday ekan, nimaga ishonish va nimadan umid qilish mumkin?

1. O‘zingizga ishoning 

Odatda ko‘p to‘siqlarni o‘zimizga o‘zimiz qo‘yamiz. Hech qanchon o‘z imkoniyatlaringizni past baholamang. Astoydil intilsangiz, albatta, yetasiz. Agar o‘zingizga ishonsangizgina hayotdagi cheklovlar va to‘siqlar bartaraf etiladi. Siz o‘ylaganingizdan ham kuchliroq, zo‘rroqsiz.
  
2. Yaxshi odamlarga ishoning 

Yaxshi odamlarga qaraganda ablah, pastkashlar bilan ko‘proq to‘qnash kelib qolamiz. Biroq dunyoda yaxshi odamlar ulardan ko‘proq. Odamlar bilan ochiq muloqotga kirishishga, do‘stlar topishga va shaxsiy hayotingizni barpo etishga xalaqit beruvchi shubha, gumonlarga ko‘pam berilmang. Garchi, kuyib qolgan bo‘lsangiz ham, odamlardan qochmang. Odamlarga ishonchingizni oqlashga imkon bering. Yaxshi odamlarga ishoning va ularni izlab toping.

3. Yaxshiliklarga ishoning 

Nimaga ishonish va nimadan umid qilish mumkin? Yaxshiliklardan. Pessimistlar odatda optimistlarga qaraganda omadsiz bo‘lishadi. Buni biz emas, statistika aytyapti. Lekin bu optimistlar haqiqiy voqelikni ko‘rmasdan havoyi orzulari bilan osmonlarda uchib yurishlari mumkin, degani emas. Muhimi, yaxshiliklarga ishonish va voqelikni teran aql bilan baholay olishdir.

4. Qat’iyatga ishoning 

Ayrimlar omadli odamlarning ishlari o‘z-o‘zidan yurishib ketaveradi, deb o‘ylashadi. Ammo bu haqiqatga unchalik ham yaqin emas. Har bir g‘alaba ortida qat’iyat va ishonch yashirin bo‘ladi. Odam to‘siq va yutqazishlarga qaramasdan olg‘a intilsagina natijani g‘alaba bilan nishonlaydi. O‘sha o‘zimizning qadrdon qat’iyatimiz va g‘ayratimiz bilan tog‘larni bo‘ysundirishimiz mumkin.

5. Mehnatsevarlikka ishoning 

Nimanidir orzu qilishning yoki istashning o‘zi yetarli emas. Mashaqqatli mehnat farovonlik bilan hamqadam bo‘ladi. Biz omadni baxtli tasodif sifatida tasavvur qilamiz. Biroq omad – jiddiy o‘ylangan, tayyorgarlik ko‘rilgan va samarali mehnat mahsulidir. Nimanidir qo‘lga kiritish uchun intilmoq zarur. Odamda yakuniy natijani ko‘ramiz, buning uchun insonlar nimalar qilganini bilishni ham istamaymiz. Mehnatsevarlik – bu doimiy ish, mustaqil ravishda doimiy o‘qib-o‘rganish, qat’iy tartib-intizom. 

6. O‘zgarishlarga ishoning 

O‘zgarishlar haqida gapirganda, tan olish kerakki, ulardan qochib qutulib bo‘lmaydi. Dunyo juda tez o‘zgarib shakllanib boryapti. Kechagina g‘alati ko‘ringan narsa, bugun odatiy holatga aylanib qolgan.  O‘zgarishlar va tanaffuslar – hayotning tabiiy yo‘ldoshlari hisoblanadi. O‘zgarishlarga ishonish va ularga qarshi turmaslik kerak. Biroq siz bu o‘zgarishlarga moslashishingiz va uni o‘z maqsadlaringiz yo‘lida qo‘llashingiz mumkin. Eng moslashuvchan odamlargina g‘olib bo‘ladi.

7. Muammolar tugashiga ishoning 

Hayotda murakkabliklarga, muammolarga duch kelasiz. Yo‘lingizdagi to‘siqlar harakatingizga xalaqit beradi. Agar bir joyda qolib ketmasdan harakatda davom etsangiz, barcha noxushliklar ortda qoladi. Bir ajoyib odam aytgan ekan: “Hammasi o‘tib ketadi. Bu ham o‘tadi”.

8. O‘z qadringizga ishoning

Biz o‘zimizni juda kichkina odam, hech narsa bizga bog‘liq emas, deb bilamiz. Hamma ko‘ngilsizliklar uchun davlatni, davrni, korrupsiyani, inqirozni ayblashimiz mumkin. Biroq bu qay darajada oqilona fikr? Hayotingiz o‘z qarorlaringizga bog‘liq. O‘zingiz uchun va atrofdagilaringiz uchun aynan o‘zingiz mas’ulsiz. O‘z qadringizga yetishingiz, o‘zingizni shamol o‘ynatayotgan bargdek his qilmasligingiz zarur. Harakatlaringiz nafaqat sizni, balki atrofingizdagi olamni ham o‘zgartira oladi. O‘zingiz uchun o‘zingiz javob berasiz.

9. Umidlaringizga ishoning 

Umid – juda qiziq narsa. Hamma narsa tugagandek tuyulanida, umid bizni qo‘llab-quvvatlashni boshlaydi. Hatto eng qiyin davrlarda ham taslim bo‘lmaslikka, ruhan sinmaslikka undaydi. Agar depressiya yoki umidsizlikka tushsangiz, vaziyat og‘irlashadi. Hamma vaqt g‘alabaga ishoning. Umidga ishoning va eng qorong‘u kunlaringizda ham uni yo‘qotmang. Gʻalabalar shu tarzda keladi.
 
10. Orzu va maqsadlaringizga ishoning 

Nimaga ishonish kerak? Kelajakda-chi? Mashaqqatli mehnat muhim, biroq buning uchun motivatsiya zarur. Orzu va ishonchdan ham kuchliroq ruhlantiradigan motivatsiya bormikan? Oldingizga maqsad qo‘ying, rejalang va inja orzularingiz sari olg‘a yuring. Orzular umid beradi va kelajakni yaxshi tarafga o‘zgartirish uchun ichki quvvatimiz yetarli ekanligini eslatib turadi. Ishonsa bo‘ladigan ko‘p narsalar bor. Biroq vaziyat uncha yaxshi bo‘lmaganda nimaga ishonish kerak? O‘zingizga va yaqinlaringiz. Agar o‘zingizga va baxtli kelajagingizga ishonmas ekansiz, dunyo sizga sariq chaqa ham bermaydi. 

Yaxshi o‘zgarishlar davri kelishini istaysizmi? Unda, avvalo, o‘zingizga va yorqin kelajagingizga ishoning. Hamma buyuk narsalar ishonchdan boshlanadi.

• Foydali
• qiziqarli