Rossiya-Ukraina urushi boshlanganidan so'ng, Polsha xavfsizlik muammolarini hal qilish uchun NATOning sharqiy qanotida eng kuchli armiyalardan birini yaratmoqchi. Buning uchun mamlakat harbiy xarajatlarini oshiradi.

Oxirgi ikki yil ichida mudofaa sanoatiga katta sarmoya kiritgan Janubiy Koreya va AQSh kabi davlatlar bilan bir qancha qurol bitimlari imzolagan Polsha, Yevropaning eng kuchli armiyaga ega mamlakatlaridan biriga aylanishni maqsad qilgan.

Rossiya-Ukraina urushi boshlanishidan kelib chiqadigan xavfsizlik tahdidlarini inobatga olgan holda, Polsha hukumatining joriy yil oxirigacha harbiy xarajatlari 130 milliard zloti (27,7 milliard yevro)ga yetishi mumkin. Bu ko'rsatkich mamlakat yalpi ichki mahsulotining (YaIM) 4 foiziga to'g'ri keladi va bu NATO a'zolari orasida eng yuqori ko'rsatkichdir.

2035-yilga kelib, mamlakat harbiy xarajatlarga jami 524 milliard PLN (117,6 milliard yevro) sarflashi kutilmoqda.

Polsha mudofaa vaziri Mariush Blashchak 2022-yil iyul oyida shunday degan edi: “Kreml kuchli davlatga hujum qilmaydi. Agar ular zaif joyni ko'rsalar, u yerga hujum qilishadi. Artilleriya va zirhli qismlarga kelsak, Yevropada Polshadan kuchliroq davlat bo'lmaydi. Yevropadagi NATO davlatlari orasida biz eng kuchli quruqlikdagi kuchlarga ega bo‘lamiz”.

Rossiyaning Ukrainaga hujumidan keyin Polsha ommaviy axborot vositalarida mamlakat xavf ostida ekanligi haqida xabarlar paydo bo'la boshladi.

Urush boshlanganidan bir necha hafta o'tgach, 2022-yil 5-aprelda Varshava 250 ta Amerikaning Abrams tanklarini sotib olish bo'yicha taxminan 5 milliard yevrolik shartnoma imzoladi.

2022-yil iyul oyida Polsha rasmiylari Janubiy Koreya bilan 1000 ta K2 Black Panther tanklari va 672 ta K9 Thunder gaubitsalarini sotib olishni nazarda tutuvchi yana bir shartnoma imzoladi.

2022-yilning noyabrida Polsha Janubiy Koreya bilan 218 ta K239 Chunmoo raketalarini sotib olish bo‘yicha kelishuvga erishdi.

Vazir Blashchak 8-fevral kuni Qo'shma Shtatlar Varshavaga 500 ga yaqin HIMARS raketa tizimlarini sotishni ma'qullaganini e'lon qildi.

Dengiz kuchlari ham kuchaytiriladi

Boltiq dengizidagi qirg'oq chizig'i qisman Rossiya bilan chegaradosh Polsha yaqinda o'z dengiz flotini mustahkamlash choralarini ko'rdi.

Urush boshlanganidan keyin Polsha Britaniyaning qurol ishlab chiqaruvchi Babcock bilan uchta yangi fregat uchun 1,4 milliard funt sterling (1,65 milliard yevro)lik shartnoma imzoladi.

Polshada quriladigan Miecznik sinfidagi harbiy kemalar Qirollik dengiz flotining Type 31 fregatlarining o‘xshash versiyalari bo‘ladi. Polsha ham dengiz flotini suv osti kemalari bilan mustahkamlash niyatida.

Polsha armiyasi ham Qurolli Kuchlar shaxsiy tarkibini oshirishga intilmoqda. U o‘tgan yili 150 ming nafar harbiy xizmatchilar sonini 2035-yilga borib kamida 300 mingga yetkazishni maqsad qilgan.

Ayni paytda Polsha Qurolli Kuchlarining shaxsiy tarkibi 172 ming harbiy xizmatchidan iborat.

• Polsha
• Qurolli Kuchlar
• armiya