Shavkat Mirziyoyev 16-mart kuni Davlat soliq qo‘mitasining Ma’lumotlarni qayta ishlash markazini borib ko‘rdi. Bu haqda Prezident matbuot xizmati xabar berdi.

Qayd etilishicha, mamlakatda aholi va biznes uchun qulayliklarni oshirish, inson aralashuvini kamaytirish maqsadida soliq organlari faoliyati izchil raqamlashtirilmoqda. Xususan, ushbu markaz O‘zbekiston Respublikasi Prezidentining 2020-yil 30-oktyabrdagi farmoniga muvofiq, to‘liq yangilangan. Davlat byudjetidan ajratilgan 100 milliard so‘m evaziga binolar ta’mirlanib, uzluksiz elektr ta’minoti qurilmalari, presizion konditsionerlar, katta hajmli server va kompyuterlar bilan jihozlangan.

Natijada markaz quvvati 8 martaga oshdi, elektron xizmatlar ko‘lami kengaydi. Shaxsiy kartochkalarda saldo qatorlarini hisoblash kabi murakkab jarayonlar 10 barobar tezlashgan. Masalan, ilgari respublika bo‘yicha hisoblashga 24 soat ketgan bo‘lsa, endilikda bu jarayon 2-3 soatda amalga oshirilmoqda. Bu yashirin iqtisodiyotni qisqartirishda muhim omil bo‘lmoqda.

Qayd etilishicha, kiberhujumdan himoya, biznes-analitika texnologiyalari joriy qilingan. Xususan, “e-ijara”, “e-imtiyoz”, “Qo‘shilgan qiymat solig‘i to‘lovchilari”, “Soliq tekshiruvlari”, “Avtomatlashtirilgan kameral nazorat tizimi”, “Soliq uzilishi koeffisiyenti” kabi yangi dasturiy mahsulotlar ishlab chiqilgan.

Bu markazni mamlakat soliq tizimining “miyasi” deyish mumkin. Bu yerga barcha soliq to‘lovchilarning ma’lumotlari integratsiya qilingan. 50 nafarga  yaqin malakali mutaxassis soliq aylanmasini onlayn rejimda kuzatib, masofadan tezkor xizmat ko‘rsatadi. 

Shuningek, davlat rahbari markazdagi ish jarayonini ko‘zdan kechirgan. Soliq organlari faoliyati samaradorligini oshirish bo‘yicha topshiriqlar bergan.

• DSQ
• Prezident
• Shavkat Mirziyoyev
• Tashrif