Prezident matbuot kotibi Sherzod Asadov Nyu York shahrida BMT bosh kotibining yordamchisi – BMT matbuot kotibi Stefan Dyujarrik bilan uchrashuv o‘tkazdi.

Muloqot chog‘ida tomonlar O‘zbekiston va Birlashgan Millatlar Tashkiloti o‘rtasidagi hamkorlikni yanada mustahkamlash masalalarini muhokama qilgan. Xususan, qo‘shma tadbirlar va oliy darajadagi tashriflarni yoritish jarayonida O‘zbekiston va BMT axborot xizmatlari o‘rtasida yaqin hamkorlik yo‘lga qo‘yilgani, o‘zaro qo‘llab-quvvatlash an’anaga aylangani ta’kidlangan.

Shuningdek, uchrashuvda jurnalistlar o‘rtasida tajriba almashish, ularning malakasini oshirishga qaratilgan qo‘shma loyihalar istiqbollari muhokama qilingan. Bu borada BMTning turli tuzilma va institutlari imkoniyatlaridan foydalanish muhimligi qayd etilgan.

Sherzod Asadov O‘zbekiston ommaviy axborot vositalari vakillari BMT tashabbuslarini keng yoritishda faol ishtirok etishini qo‘llab-quvvatlashga tayyorligini bildirgan.

Sherzod Asadov, shuningdek, Nyu York shahrida bugun BMT bosh kotibining global kommunikatsiyalar bo‘yicha o‘rinbosari Melissa Fleming bilan uchrashuv o‘tkazgan edi. Uchrashuvda BMT doirasidagi Barqaror rivojlanish maqsadlarini ilgari surish, yolg‘on axborot tarqalishiga qarshi kurashish va yoshlarni global tashabbuslarga jalb etishga qaratilgan muhim loyihalar va kampaniyalar muhokama qilingan.

• BMT
• Sherzod Asadov
• uchrashuv