Oliy toifali shifokor Raʼno Nosirova bu borada bir necha talablar mavjudligini maʼlum qildi. Xususan, ayrim xasta insonlar oʻz salomatliklarini yanada ogʻirlashtirmasliklari uchun roʻza tutmasligi lozim.

Qayd etilishicha, davolash imkoni yoʻq, jarrohlik amaliyoti oʻtkazilishini talab qiluvchi va jarrohlikdan keyingi davrda ushbu amalni bajarish maqsadga muvofiq emas. Shuningdek, qatʼiy taomlanishi shart boʻlgan kishilar ham roʻza tutmaydi.

Bundan tashqari, doimiy ravishda dori ichishi kerak boʻladigan yurak-qon tomir, buyrak va jigar xastaliklarining ogʻir koʻrinishlari hamda qandli diabetda ham ushbu amalni bajarish durust emas.

Qolaversa, ogʻriq bilan kechadigan va ogʻriq qoldiruvchi dorilarni muntazam qabul qilishi talab qilinadigan, xususan, sil va onkologik kasalliklarining ayrim turlarida ham roʻza tutish tavsiya etilmaydi.

Taʼkidlanishicha, agar bunday bemorlar roʻza tutish istagida boʻlsa, eng avvalo, shifokor bilan maslahatlashishi va uning koʻrsatmalariga qatʼiy amal qilishi lozim.

• Foydali
• Ramazon