Qashqadaryo viloyatining G‘uzor tumanida YPX xodimiga faol qarshilik ko‘rsatgan Cobalt haydovchisi qamoqqa olindi. Bu haqda IIV matbuot xizmati xabar berdi.

Ijtimoiy tarmoqlarda ikki YPX xodimi va Cobalt haydovchisi o‘rtasida janjal yuzaga kelgani aks etgan video tarqalgandi. Videoda haydovchi xodimni musht bilan urganini ham ko‘rish mumkin.

G‘uzor tumani IIB YHXB inspektori Shahzod Nazarovning ma’lum qilishicha, belgilangan hududda xizmat olib borayotganida Cobalt avtomobili to‘xtash va to‘xtab turish taqiqlangan yo‘l belgisi o‘rnatilgan joyda qoldirib ketilganini ko‘rgan. Birozdan so‘ng haydovchining o‘zi kelgan va xodim undan hujjatlarini so‘raganida taqdim qilmasdan, uning qonuniy talablariga bo‘ysunmasdan avtomobilini haydab ketishga uringan.

Cobalt haydovchisi YPX xodimlariga bo‘ysunmay, qochishga harakat qilganini, uni avtomobildan tushirib olishgani uchun jahli chiqib qarshilik ko‘rsatib, janjallashib ketganini tan olgan va qilmishidan pushaymonligini aytib, kechirim so‘radi.

Unga nisbatan Jinoyat kodeksining 219-moddasi (hokimiyat vakiliga yoki fuqaroviy burchini bajarayotgan shaxsga qarshilik ko‘rsatish) bilan jinoyat ishi qo‘zg‘atildi. Ushbu modda bilan aybdor deb topilgan shaxs BHMning 50 baravaridan 100 baravarigacha (18 million 750 ming so‘mdan 37,5 million so‘mgacha) miqdorda jarima yoki 360 soatgacha majburiy jamoat ishlari yoxud 3 yilgacha axloq tuzatish ishlari yoki 1 yildan 3 yilgacha ozodlikni cheklash yoki 1 yildan 3 yilgacha ozodlikdan mahrum qilish bilan jazolanadi.

• Haydovchi
• Janjal
• Jinoyat
• Qashqadaryo
• YPX