Misr poytaxti Qohirada Falastin-Isroil mojarosini hal qilishga qaratilgan “tinchlik sammiti” bo‘lib o‘tdi. Biroq uning ishtirokchilari yakuniy bayonot qabul qila olmadi. Bu haqda “Reuters” xabar berdi.

Xabarga ko‘ra, Yevropa, Arab va Afrikaning o‘nlab davlatlaridan rahbarlar, tashqi ishlar vazirlari va diplomatlar ishtirok etgan Qohira sammitida yakuniy qaror qabul qilinmagan. Ishtirokchilar o‘rtasidagi kelishmovchilikka qator davlatlar faqat bir tomonni qoralashda turib olgani sabab bo‘lgan.

“The New York Times” manbalarining qayd etishicha, Yevropa etakchilari Isroilning XAMASdan himoyalanish huquqi qayd etilmagan qo‘shma deklarasiya loyihasini imzolay olmasliklarini oldindan bilgan holda tashrif buyurgan.

Falastin ma’muriyati rahbari Mahmud Abbos sammit ishtirokchilariga falastinliklar “o‘z yurtlaridan quvib chiqarilmasligini” aytdi. O‘z navbatida Fransiya G‘azoga gumanitar koridor yaratishga chaqirdi, bu esa o‘t ochishni to‘xtatishga olib kelishi mumkin.

Reuters’ning qayd etishicha, Britaniya va Germaniya Isroil harbiylarini bosiqlikka chaqirgan, Italiya esa vaziyatning yanada avj olishiga yo‘l qo‘ymaslik muhimligini bildirgan.

Sammitga AQShdan faqat AQShning Misrdagi muvaqqat ishlar vakili tashrif buyurgan bo‘lib, u ishtirokchilar oldida chiqish qilmadi. Yevropa kengashi rahbari Charlz Mishel sammitning asosiy maqsadi “bir-birlarini o‘zaro tinglash” bo‘lganini qayd etgan.

Isroildan esa vakillar ishtirok etmagan. “Reuters” va “The New York Times” ushbu uchrashuvga Isroil vakillari taklif qilinganmi yoki yo‘qmi, aniqlik kiritmagan.

• AQSh
• Afrika
• Misr
• Saudiya Arabistoni
• Yevropa
• sammit