Bosh prokuratura ma’lumotiga ko‘ra, Uzbelas Performance avtoservisi rahbari Asadbek Jumayev ishtirokidagi videointervyu o‘rganib chiqilgan.

Aniqlanishicha, Jinoyat ishlari bo‘yicha Toshkent shahar Mirzo Ulug‘bek tumani sudining 2026-yil 16-yanvardagi qaroriga asosan A.Jumayev Ma’muriy javobgarlik to‘g‘risidagi kodeksning 195-2-moddasi (huquqni muhofaza qiluvchi organlar xodimlarining foto va (yoki) videotasvirini ularning obro‘sizlantirilishiga olib keladigan tarzda buzib tarqatish) bilan bazaviy hisoblash miqdorining 20 baravari miqdorida, ya’ni 8,4 mln so‘m jarimaga tortilgan.

Bosh prokuratura holatga qo‘shimcha huquqiy baho berish maqsadida 26-fevral kuni Toshkent shahar sudining jinoyat ishlari bo‘yicha sudlov hay’atiga protest kiritganini ma’lum qildi.

Ma’lumot uchun, tarmoqlarda 2026-yilning yanvar oyida Toshkent shahri Shahrisabz ko‘chasida BMW rusumli ikkita transport vositasi YPX xodimlarining to‘xtash ishorasiga bo‘ysunmasdan harakatlangani tasvirlangan video tarqalgan edi. Haydovchilardan biri inspektorni ko‘rganida tezlikni pasaytirgan, biroq to‘xtamasdan ketib qolgan, xodim esa mashinaning ortidan o‘zining jezlini otgancha qolib ketgan.

Bloger Malik Muhamedov Asadbek Jumayevdan intervyu olib, undan o‘sha voqea bo‘yicha fikrini so‘radi. Jumayev bu voqea uchun boshqalar 15 sutkaga qamalishi, o‘zlari esa jarima bilan qutulib qolganini aytgan. Ushbu video ijtimoiy tarmoqlarda tarqalgach, jamoatchilik faollari qoidabuzar haydovchini, shuningdek, bu holatga bee’tibor qolayotgan mas’ullarni qoraladi.

• Bosh prokuratura
• Qoidabuzarlik
• Sud
• Toshkent