Rossiyaga kelgan muhojirlar oilalaridagi bolalarning 80 foizi maktabga qabul qilinmadi. Bu haqda Ta’lim va fanni nazorat qilish federal xizmati (“Rosobrnadzor“)rahbari Anzor Muzayevga tayanib, RIA Novosti xabar berdi.

Ma’lum qilinishicha, bolalarning atigi 19 foizi rus tilidan majburiy test topshirganidan va ota-onalari zarur hujjatlarni to‘g‘ri rasmiylashtirgandan so‘ng Rossiya maktablariga o‘qishga kira olgan. Sentyabr oyida xorijliklar uchun majburiy hisoblangan rus tili testini topshirgan 5 940 nafar boladan 2 964 nafari (qariyb 50 foizi) muvaffaqiyatli imtihondan o‘tgani xabar qilingandi. Biroq bu, maktabga kirish uchun ariza topshirgan umumiy bolalar sonining 12,6 foizini tashkil etadi xolos.

“Biz bu masalani o‘rganishni boshlayapmiz: bolalar va maktab o‘rtasidagi vaziyat qanday, o‘qituvchi uchun nima o‘zgardi, vaziyat o‘zi umuman qanday o‘zgardi?”, – dedi Muzayev.

Rossiyada xorijlik oilalar bolalari uchun majburiy test sinovi 2025-yil aprel oyida joriy etilgan edi. Bunday testlarning murakkabligi bola o‘qishga kirishni rejalashtirayotgan sinfga qarab farqlanadi. Shu bilan birga, qonun loyihasi rus tili yagona tili hisoblangan xorijlik oilalarning bolalarini ham qisman qamrab oladi. Qayd etilishicha, ota-onalar tomonidan hujjatlarni to‘g‘ri rasmiylashtirishdagi qiyinchiliklar va rus tilini bilish darajasi pastligi ko‘plab muhojir bolalarining ta’lim olish imkoniyatini cheklagan.

• Maktab
• Rossiya
• migrant