O‘tgan yilda sudlar tomonidan 79 554 nafar shaxsga nisbatan 63 177 ta jinoyat ishi ko‘rib chiqildi. Bunda sudlanganlar 63 340 nafarni tashkil etib, shundan 18 816 nafar shaxsga ozodlikdan mahrum qilish va 43 531 nafariga boshqa turdagi jazolar tayinlandi, 993 nafar shaxs shartli hukm qilingan. Bu haqda Oliy sud matbuot xizmati xabar berdi.

Sudlangan shaxslarning 55 829 nafari erkak, 7 511 nafari ayol, 23 973 nafari yoshlar (shu jumladan, 2 431 nafari voyaga yetmagan) va 2 830 nafari 60 yoshdan oshgan shaxslar bo‘lishgan. Shuningdek, 422 kishi shaxs oqlanib, reabilitatsiya qilindi, yarashuv institutlari natijasida esa 13 224 kishi jinoiy javobgarlikdan ozod etilgan.

Jinoyat ishlarining katta qismi Toshkent shahri, Farg‘ona, Toshkent, Samarqand va Namangan viloyatlarida ko‘rilgan.

Sud zalidan ozodlikdan mahrum etish bilan bog‘liq bo‘lmagan jazolar tayinlanishi munosabati bilan 8 085 nafar shaxs ozod qilinib, 15 992 kishiga asossiz ravishda qo‘yilgan moddalar ayblovdan chiqarib tashlandi yoki qayta malakalandi. Kafolat xatlari asosida 86 nafar shaxs, jumladan yoshlar, ayollar va boshqalarga ozodlikdan mahrum qilish bilan bog‘liq bo‘lmagan jazolar tayinlangan.

Shu bilan birga, 35 572 nafar shaxs jazoni o‘tashdan muddatidan ilgari shartli ozod qilinib, 11 421 nafar shaxsning jazosi yengilrog‘i bilan almashtirilgan.

Ko‘rilgan jinoyat ishlarning aksariyatini:

– firibgarlik;

– transport vositalari harakati yoki ulardan foydalanish xavfsizligi qoidalarini buzish;

– o‘g‘rilik;

– giyohvandlik bilan bog‘liq;

– o‘zlashtirish yoki rastrata yo‘li bilan talon-toroj qilish;

– hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish;

– qo‘shmachilik qilish yoki fohishaxona saqlash;

– taqiqlangan ekinlarni yetishtirish;

– qasddan badanga o‘rtacha og‘ir shikast yetkazish bilan bog‘liq jinoyatlar tashkil etadi.

Apellyatsiya tartibida 340 nafar shaxsga, kassatsiyada esa 379 kishiga nisbatan birinchi instansiya sudlari tomonidan chiqarilgan qarorlar bekor qilinib, mos ravishda 2 375 nafar shaxsga va 1 383 kishiga nisbatan chiqarilgan sud qarorlari o‘zgartirilgan. Taftish tartibida ham 173 nafar shaxsga chiqarilgan qarorlar bekor qilindi, 813 nafariga nisbatan o‘zgartirilgan.

Shuningdek, Oliy sudning Jinoyat ishlari bo‘yicha sudlov hay’ati tomonidan taftish tartibida 1 072 kishining ishi ko‘rilib, 213 kishiga quyi sudlar tomonidan chiqarilgan qarorlar bekor qilinib, 325 nafar shaxsga nisbatan chiqarilgan sud qarorlari o‘zgartirilgan.

• Oliy sud
• statistika