14 kundan buyon Ukraina koʻchalarida otishmalar, snaryadlarning portlashi, jon talvasasida qichqirayotgan yarador askarning ovozi eshitilmoqda. Har ikki tomon jiddiy yoʻqotishlarga uchragan. Deyarli bir haftadan beri qamalda qolgan Mariupolda odamlar bomba yomgʻiridan berkinib tunni oʻtkazmoqda. 

Ushbu maqolada Rossiya Ukraina oʻrtasida kechayotgan urushning oʻn uchinchi kuni asosiy voqealari va fotosuratlarini toʻpladik.

8-mart kuniga oʻtar kechasi Rossiya aviatsiyasi Brovaridagi kimyoviy moddalar ombori va Jitomir viloyatidagi neft bazasini oʻqqa tutdi. Bundan tashqari Sumi va uning atrofidagi aholi punktlariga ham aviazarba berilgan. Buning oqibatida 10 dan ortiq kishi, jumladan, bir nechta bola halok boʻlgan.

Oʻsha kuni tush vaqtida Rossiya harbiylari ikki soat davomida Axtirka shahrini bombardimon qildi. Shahar hokimining taʼkidlashicha, shahardagi deyarli barcha binolar vayronaga aylantirilgan.

“Temiryoʻl vokzali, ijroiya qoʻmita binosi, oʻlkashunoslik muzeyi, mahalliy universal doʻkon va barcha savdo binolari butunlay vayron boʻlgan. Issiqlik elektr stansiyasi oʻchirilgan, elektr yoʻq, kanalizatsiya kollektori vayron boʻlgan, suv taʼminoti qisman yoʻq”, – deydi shahar hokimi Pavel Kuzmenko.

Ukraina Qurolli kuchlari Bosh shtabi dushman Kiyevga hujum uyushtirish uchun qayta toʻplanganini maʼlum qilmoqda. Maʼlumotlarga koʻra, Rossiya kuchlarining asosiy saʼy-harakatlari hamon Kiyev, Xarkov, Mariupol, Nikolaev, Chernigov va Sumini oʻrab olish hamda egallashga qaratilgan.

• Kiyev
• Rossiya
• Ukraina
• Urush
• vayronagarchilik