Moskvaning Basmanniy sudi “Birinchi kanal” sobiq xodimi Marina Ovsyannikovani sirtdan sakkiz yarim yilga umumiy rejimli koloniyaga hukm qildi. Bu haqda mahalliy nashrlar xabar berdi.

Sud Ovsyannikovani Rossiya armiyasi haqida siyosiy nafrat qo‘zg‘atuvchi “feyk” tarqatishda aybdor deb topdi. Prokuratura Ovsyannikova uchun to‘qqiz yarim yillik qamoq jazosini so‘ragan.

Marina Ovsyannikova 2022-yil mart oyida “Birinchi kanal”dagi jonli efir vaqtida urushga qarshi plakat bilan chiqqandi. Shundan keyin u dunyoga tanildi. Aksiyadan so‘ng jurnalist ishdan bo‘shatildi, Rossiyani tark etdi va bir necha oy Germaniyada ishladi. Keyinchalik u Moskvaga qaytib keldi va urushga qarshi harakatlarda qatnashishni davom ettirdi. U armiyani “obro‘sizlantirish” moddasi bo‘yicha uch marta jarimaga tortildi.

2022-yil avgust oyida Ovsyannikovaga qarshi Rossiya armiyasi haqidagi “feyk” uchun jinoiy ish ochildi. Bunga uning Kreml ro‘parasida “Putin – qotil” yozuvli plakat bilan piket uyushtirgani sabab bo‘ldi. Plakatda “Putin –  qotil. Uning askarlari fashistlardir. 352 nafar bola halok bo‘ldi. Urushni to‘xtatishingiz uchun yana qancha bolalar o‘lishi kerak?”, – deb yozilgandi.

Ovsyannikova uy qamog‘iga olindi, ammo u qizi bilan qochib ketdi. Ovsyannikovaning ijtimoiy tarmoqlariga ko‘ra, u hozir Parijda.

• Germaniya
• Putin
• Rossiya
• Sud