Mevalar vitaminning koni bo‘lgani bilan ularning barchasini cheklanmagan miqdorda iste’mol qilib bo‘lmaydi. Ayrimlari shu qadar shirinki, qondagi qand miqdorini oshirib, organizmga zararli ta’sir ko‘rsatishi isbotlangan. Shuning uchun ham ikkinchi yoki uchinchi bananni yeyish uchun qo‘lga olganda bu bilan tanangizga xavf tug‘dirayotganingiz yodda tursin. Mevalardan, ayniqsa, ozish istagida yurganlar ehtiyot bo‘lishlari lozim. Chunki ular tarkibidagi asosiy modda – uglevodlar, chiroyli qomatning asosiy dushmanidir. 

Qaysi mevalarni iste’mol qilishda ehtiyot bo‘lgan ma’qul?

Eng shirin meva, bu – mango sanaladi. Uning 100 grammida 14 gramm shakar va 70 gramm kaloriya mavjud. Agar juda yegingiz kelayotgan bo‘lsa, ananas va kivi bilan aralashtirish mumkin.

100 gramm gilos tarkibida ham 17 gramm shakar bo‘ladi. Undan qandli diabetga chalinganlar uzoqroq yurishlari kerak. Bundan tashqari, gilos qorin dam bo‘lishiga ham olib keladi.

Banan tarkibida esa 16 gramm shakar mavjud. U boshdan-oyoq uglevodlardan tashkil topgan. Organizm uchun eng ko‘p foyda keltiradigani, yashilsifat banan hisoblanadi. Unda shakar kamroq, kletchatka esa ko‘proq bo‘ladi. Biroq bu turdagi bananni nordon bo‘lgani uchun hamma ham yeya olmaydi.

Kokos tarkibida esa 283 kaloriya jamlangan. Turgan-bitgani yog‘dan iborat meva. Garchi, kokos eng mazali desert sanalsa ham, u juda kaloriyali hisoblanadi. Agar desertni biror meva bilan bezamoqchi bo‘lsangiz, yaxshisi kivi va qorag‘atdan foydalaning. Ularning ko‘rinishi chiroyli, kaloriyasi esa deyarli yo‘q. 

Apelsinlar tarkibida esa shakar va kaloriya uncha ko‘p emas, biroq uning sharbati tish emalini yemirishi mumkin. Shuning uchun har doim ham yangi chiqarilgan apelsin sharbatini ichish tavsiya qilinmaydi. 

Klyukva sharbati esa buyragi og‘riydigan odamlarga shifo bo‘ladi. 100 gramm meva tarkibidagi 123 kaloriya mevaning to‘yimliligini yana ham oshiradi.

Agar siz ushbu mevalarni kam miqdorda yoki boshqa nordonroq mevalar bilan birga iste’mol qilsangiz, zarar qilmaydi. Klyukvaning esa sharbatidan ko‘ra, kompoti foydaliroqdir. Shuningdek, parhezshunoslar mevalarni o‘z pishadigan mavsumidan boshqa paytda iste’mol qilishni tavsiya qilmaydi. Chunki ularga aynib qolmasligi uchun maxsus vositalar yordamida ishlov beriladi. Shuning uchun meva va sabzavotlarni har doim o‘z mavsumida yegan yaxshiroq. Muzlatilgan mevalardan ham uzoqroq yurishga harakat qiling. Mavsumi o‘tib ketgan mangodan ko‘ra, oddiygina sabzi sharbati foydaliroqdir.

• Foydali
• qiziqarli
• salomatlik