24-sentyabr kuni Toshkent viloyatining Piskent va Bo‘ka tumanlaridagi bir necha maktabgacha ta’lim tashkiloti tarbiyalanuvchilari salomatligida o‘zgarish bo‘lganligi sababli tibbiyot birlashmalarining yuqumli kasalliklar bo‘limiga murojaat qilingan. Bu haqda, Maktabgacha va maktab ta’limi vazirligi xabar berdi.

Tibbiy ko‘rik natijalariga ko‘ra, bemor bolalarga “oshqozon-ichak faoliyatining o‘tkir buzilishi, ovqatdan zaharlanish” tashxisi qo‘yilgan. Og‘ir ahvoldagi bolalar yo'qligi sababli bolalarga zarur muolajalar qilinib uylariga javob berilgan.

Vaziyat Maktabgacha va maktab ta’limi vazirligi tomonidan darhol nazoratga olinib, uni Sanitariya-epidemiologik osoyishtalik qo‘mitasi hamda huquqni muhofaza qiluvchi organlar ko‘rib chiqmoqda.

Dastlabki taxminlarga ko‘ra, Oqqo‘rg‘on tumanidagi sexlardan birida ishlab chiqarilgan sifatsiz sut mahsuloti – 3,2 foizli kefir sabab bo‘lgan.

Hozirda bemorlardan olingan tahlillar va oziq-ovqat namunalari laboratoriyada tekshirilmoqda. Rasmiy xulosalar chiqqach, qo‘shimcha ma’lumotlar taqdim etilishi aytildi.

• Tibbiyot
• Toshkent viloyati
• Zaharlanish