Samarqand tumanini alohida ma’muriy-hududiy birlik sifatida tugatish va Samarqand shahri chegaralarini kengaytirish bo‘yicha taklif Oliy Majlis Qonunchilik palatasida ma’qullandi.

Qarorga ko‘ra, Oqdaryo tumanidan 1 410,6 gektar, Pastdarg‘om tumanidan 1 242,3 gektar, Samarqand tumanidan 13 308 gektar hamda Toyloq tumanidan 1 265,6 gektar yer maydoni Samarqand shahri tarkibiga o‘tkaziladi. Natijada shaharga jami 17 ming gektardan ortiq hudud qo‘shiladi.

Chegaralar o‘zgarishi natijasida Samarqand shahrining umumiy hududi 11,8 ming gektardan 28,9 ming gektargacha kengayadi. Shuningdek, shahar aholisi 604 ming nafardan 882 ming nafargacha oshishi kutilmoqda.

Mazkur o‘zgarishlar Samarqandni “millionli shahar”ga aylantirish, zamonaviy turar-joy va noturar binolar qurish hamda yangi infratuzilma loyihalarini amalga oshirish uchun imkoniyat yaratishi ko‘zda tutilgan.

Shuningdek, “Shirin” shaharchasi, “Temir yo‘l orti” hududi va “Qorasuv-2” massivlarida 309 ming aholiga mo‘ljallangan 710 ta ko‘p qavatli uy-joy qurilishi rejalashtirilmoqda.

Shahar hududida yangi turistik loyihalar, akvaparklar, istirohat bog‘lari, o‘yin maydonlari, havo sharlari uchun maskanlar, yashil hududlar, xizmat ko‘rsatish obyektlari va logistika markazlarini tashkil etish ham rejalashtirilgan.