7 avgust kuni Oliy Majlis Senatining 18-yalpi majlisida “O‘zbekiston Respublikasi Prezidenti Administratsiyasi to‘g‘risida”gi Konstitutsiyaviy qonun ma’qullandi. Mazkur hujjat Prezident Administratsiyasining huquqiy maqomi, asosiy vazifalari, vakolatlari va faoliyatini tashkil etish tartibini belgilab beradi.

Qonun O‘zbekiston Respublikasi Konstitutsiyasi talablaridan kelib chiqib ishlab chiqilgan. Unda Prezident Administratsiyasining davlat boshqaruvi tizimidagi o‘rni, huquqiy maqomi va faoliyatining asosiy yo‘nalishlari konstitutsiyaviy qonun darajasida mustahkamlanmoqda.

Hujjatda Administratsiyaning maqomi, faoliyat prinsiplari, tarkibiy tuzilishi va ishini tashkil etish tartibi, shuningdek, davlat hokimiyati organlari va tashkilotlari bilan o‘zaro hamkorligi aniq belgilab berilgan. Bundan tashqari, Administratsiya mansabdor shaxslari, boshqaruv va xizmatchi xodimlarining faoliyat kafolatlari ham nazarda tutilgan.

Qonunni ishlab chiqishda AQSH, Finlyandiya, Chexiya, Slovakiya, Ruminiya, Latviya, Qozog‘iston va boshqa davlatlarning tegishli tajribasi o‘rganilgan.

Senatorlarning ta’kidlashicha, Konstitutsiyaviy qonunning qabul qilinishi Prezident faoliyatini tashkiliy, huquqiy va tahliliy jihatdan ta’minlash mexanizmlarini takomillashtirish, davlat organlari o‘rtasidagi hamkorlikni mustahkamlash hamda boshqaruv samaradorligini oshirishga xizmat qiladi.

Muhokama yakunida senatorlar qonunni ma’qulladi.

Eslatib o‘tamiz, 4 avgust kuni mazkur qonun Oliy Majlis Qonunchilik palatasi deputatlari tomonidan birinchi o‘qishda ko‘rib chiqilib, qabul qilingan edi.