7 avgust kuni Toshkent xalqaro aeroporti tashabbusi bilan Toshkent viloyatining O‘rta Chirchiq tumanida parvozlar xavfsizligini ta’minlash va qidiruv-qutqaruv ishlarini tashkil etish bo‘yicha idoralararo keng ko‘lamli o‘quv mashg‘uloti o‘tkazildi.

Mashg‘ulot ssenariysiga ko‘ra, Istanbul–Toshkent yo‘nalishida parvoz qilayotgan yo‘lovchi samolyoti qo‘nishga yaqinlashgan vaqtda havo dispetcheri hamda ekipaj o‘rtasidagi aloqa uzilib qoladi. Shundan so‘ng havo kemasi Toshkent shahriga yetib kelmasdan aviahalokatga uchraydi.

Shartli aviahalokat haqidagi ma’lumot dispetcherlar tomonidan zudlik bilan aeroportning yerdagi qidiruv-qutqaruv ishlarini ta’minlash guruhiga va boshqa tegishli xizmatlarga yetkaziladi. Shundan so‘ng qidiruv-qutqaruv ishlari boshlanadi.

Simulyatsion favqulodda vaziyat oqibatlarini bartaraf etish uchun 250 ga yaqin mutaxassis va 25 ta maxsus texnika jalb qilindi.

Mashg‘ulot Favqulodda vaziyatlar, Mudofaa, Sog‘liqni saqlash, Ichki ishlar vazirliklari, Milliy gvardiya hamda Toshkent xalqaro aeroporti hamkorligida tashkil etildi.

O‘quv mashg‘uloti davomida qutqaruvchilar yong‘inni o‘chirish, odamlarni evakuatsiya qilish, jabrlanganlarni jarohatlarining og‘irlik darajasiga qarab taqsimlash, ularga birinchi tibbiy yordam ko‘rsatish va tibbiyot muassasalariga yetkazish bo‘yicha amaliy harakatlarni bajardi. Shuningdek, samolyot bortidagi xavfli yuklarni xavfsiz hududga evakuatsiya qilish ishlari ham amalga oshirildi.

“Toshkent xalqaro aeroporti” MChJ ma’lumotlariga ko‘ra, aeroport hududidagi mashg‘ulotlardan tashqari, yil davomida bir necha bor aeroportdan tashqarida ham shu kabi kompleks o‘quv tadbirlari o‘tkaziladi.

Mashg‘ulotdan asosiy maqsad aviahalokat yuz bergan taqdirda vazirlik va idoralar, shuningdek, aeroport bo‘linmalari o‘rtasidagi hamkorlikni muvofiqlashtirish, favqulodda vaziyat oqibatlarini tezkor bartaraf etish hamda xodimlarning bunday holatlarga tayyorgarligini oshirishdan iborat.

O‘quv mashg‘uloti yakunida tegishli bo‘lim va idoralar o‘rtasidagi hamkorlikni yanada mustahkamlash bo‘yicha tavsiyalar ishlab chiqildi.

Shuningdek, Toshkent aeroporti hamda tegishli idoralarning kuch va vositalari tayyorgarligi yuqori baholanib, favqulodda vaziyat yuz bergan taqdirda tezkor choralar ko‘rishga to‘liq tayyor ekani qayd etildi.