Bugun, 6-avgust kuni Andijon shahrining Pirmuhammedov ko‘chasida yo‘l-transport hodisasi sodir bo‘ldi. Andijon viloyati Yo‘l harakati xavfsizligi boshqarmasi ma’lumotiga ko‘ra, hodisada yuk mashinasi velosipedchini urib yuborgan.

Dastlabki ma’lumotlarga ko‘ra, soat 13:00 atrofida 1966-yilda tug‘ilgan X.G‘. boshqaruvidagi Isuzu rusumli yuk mashinasi harakatlanib ketayotgan vaqtda, o‘zi bilan bir yo‘nalishda yo‘lning birinchi tasmasida harakatlanayotgan velosipedchi to‘satdan chap tomonga burilgan. Natijada transport vositasi velosiped bilan to‘qnashgan.

Hodisa oqibatida velosipedchi tan jarohati olib, tibbiy ko‘rik va zarur yordam ko‘rsatish uchun Respublika shoshilinch tibbiy yordam ilmiy markazining Andijon filialiga murojaat qilgan.

Mazkur yo‘l-transport hodisasi yuzasidan Andijon shahar Ichki ishlar boshqarmasi Yo‘l harakati xavfsizligi bo‘limi xodimlari tomonidan surishtiruv ishlari olib borilmoqda.