Surxondaryoda yashovchi fuqaro I.B.ning farzandi o‘limi bilan bog‘liq video murojaati yuzasidan viloyat prokuraturasi rasmiy izoh berdi.

Oltinsoy tuman IIB navbatchilik qismining joriy yil 10-avgustdagi xabariga ko‘ra, soat 08:00 da tuman hududidan oqib o‘tuvchi “Hazarbog‘” kanali irmog‘idan Sariosiyo tumani Jannatmakon mahallasida yashagan (1995 y.t) A.I.ning jasadi topilgan.

Respublika sud-tibbiy ekspertiza ilmiy-amaliy markazi Oltinsoy tuman punktining 7-sentyabrdagi 22-sonli xulosasida ko‘rsatilgan ichki tekshiruv natijalarida marxumning ichki a’zolaridagi o‘zgarishlar nafas yetishmovchiligi natijasida vafot etgani haqidagi ma’lumotlar keltirilgan bo‘lsa-da, ekspert xulosasining bayonot qismi bilan xulosa qismida nomutanosib holati kuzatilgani sababli marhumning jasadi sud ajrimi asosida eksgumasiya qilinib (murdani ko‘zdan kechirish va ekspertiza o‘tkazish zaruriyati tug‘ilganda uni dafn etilgan joyidan qazib olish), komission sud-tibbiyot ekspertizadan o‘tkazilgan.

“2022-yil 12-sentyabrdagi 426-sonli va 14-sentyabrdagi 84-qo‘shimcha komission sud-tibbiy ekspertiza xulosalarida, A.I.ning o‘limi yuqori nafas yo‘llari, burun va og‘iz bo‘shlig‘ining suyuqlik bilan (suv) berkilib qolishidan vujudga kelgan mexanik asfiksiya natijasida kelib chiqqani, badanida aniqlangan shilinmalar va jarohatlar xususiyati bo‘yicha uning o‘limidan so‘ng kanal bo‘ylab oqishi jarayonida notekis chegaralangan yuzaki jismlarga urilishi natijasida paydo bo‘lgani, uning badanida qarshilik ko‘rsatish, urish, tepish, janjallashish natijasida yuzaga kelgan tan jarohatlari aniqlanmagani ko‘rsatilgan. Birlamchi xulosada esa o‘lim sababi cho‘kishning nafas yo‘llarini burun, og‘iz bo‘shlig‘ining suyuqlik (suv) bilan berkilishi natijasidagi spastikdan (nafas boylamalarining berkilib qolishi) vujudga kelgan mexanik asfiksiya oqibatida kelib chiqqani holati inobatga olinmagani tufayli tafovut yuzaga kelgani qayd etilgan”, – deyiladi xabarda.

Shuningdek, A.I.ning o‘limi holati bo‘yicha dastlabki ekspertiza tekshiruvi yuzasidan xulosa berishda yo‘l qo‘ygan xato va kamchiliklari uchun sud-tibbiy ekspert O‘.Bo‘tayarovga “hayfsan” berilgan.

O‘tkazilgan tergovga qadar tekshiruv natijasiga ko‘ra, marhumning o‘limida biror-bir shaxsning harakatlarida jinoyat tarkibi aniqlanmaganligi sababli 17-oktyabr kuni O‘zbekiston Respublikasi JPKning 83-moddasi 2-bandiga asosan jinoyat ishi qo‘zg‘atishni rad qilish haqida qaror qabul qilingan.

• IIB
• Kanal
• Prokuratura
• Surxondaryo
• Suvda cho'kish