O‘zbekiston Prezidenti Shavkat Mirziyoyev AQShga amaliy tashrifi davomida an’anaga ko‘ra, ushbu mamlakatda mehnat va istiqomat qilayotgan o‘zbekistonliklar, shuningdek, AQShning nufuzli universitetlarida tahsil olayotgan “El-yurt umidi” jamg‘armasi stipendiatlari bilan uchrashdi. Bu haqda Prezident matbuot xizmati xabar berdi.

Samimiy suhbat davomida Yangi O‘zbekistondagi islohotlarni amalga oshirish bilan bog‘liq masalalar, xususan, ularni faol ilgari surishda o‘zbekistonliklar va ularni birlashtiruvchi tashkilotlarning ishtiroki muhokama qilingan.

Uchrashuvda muvaffaqiyatli tadbirkorlik faoliyatini yo‘lga qo‘ygan fuqaro va yoshlar o‘rtasida muloqot maydonini yaratishga qaratilgan “Vatandoshlarning xalqaro biznes marafoni”ga start berilgan.

Ishtirokchilar O‘zbekiston va AQSh o‘rtasidagi savdo-iqtisodiy, investitsiyaviy, ilmiy va ta’lim aloqalarini kengaytirish va mustahkamlash, milliy iqtisodiyotning ustuvor sohalariga AQShning ilg‘or texnologiyalarini joriy etish, tibbiyot, transport va logistika sohalarida innovatsiyalarni ilgari surish, mamlakatda marketpleyslarni rivojlantirish bo‘yicha o‘z takliflarini bildirgan.

Davlat rahbari yig‘ilganlarga O‘zbekiston taraqqiyotiga qo‘shayotgan hissasi uchun minnatdorlik bildirib, aytilgan barcha taklif va tashabbuslar mamlakat vazirlik va idoralari tomonidan puxta o‘rganib chiqilishi, eng istiqbollilari esa amaliyotga tatbiq etilishini ta’kidlagan.

O‘zbekiston Prezidenti AQShda “El-yurt umidi” stipendiatlari soni 500 nafardan oshganiga alohida e’tibor qaratgan. Iste’dodli yoshlarni qo‘llab-quvvatlash, ularning bilim va tajribasini mamlakatda qo‘llash uchun imkoniyat yaratish davlat siyosatining asosiy ustuvor yo‘nalishlaridan biri ekanligi ta’kidlagan.

Prezident Shavkat Mirziyoyev talabalarga o‘qishda va kelgusidagi kasbiy faoliyatlarida muvaffaqiyatlar tilab, yoshlarning tashabbuslariga doimo ochiqligi va ularni har tomonlama qo‘llab-quvvatlashga tayyor ekanini ta’kidlagan.

O‘z navbatida, uchrashuv ishtirokchilari O‘zbekiston yetakchisiga xorijdagi vatandoshlar va yoshlarga ko‘rsatilayotgan e’tibor, ularning salohiyatini ro‘yobga chiqarish uchun yaratilayotgan sharoit va imkoniyatlar uchun minnatdorlik bildirib, O‘zbekiston ravnaqiga yanada ko‘proq hissa qo‘shishga tayyorligini bildirgan.

• AQSh
• Shavkat Mirziyoyev
• Tashrif
• uchrashuv