Surxondaryoda erkak it bolasining quloqlarini vahshiylarcha uzib tashlagani aks etgan video ijtimoiy tarmoqlarda keng tarqaldi. Holat yuzasidan Surxondaryo viloyati Ekologiya boshqarmasi matbuot xizmati rasmiy munosabat bildirdi.

Qayd etilishicha, Surxondaryo viloyati Ekologiya va iqlim o‘zgarishi bosh boshqarmasi hamda Surxondaryo viloyati Ichki ishlar boshqarmasi tomonidan olib borilgan o‘rganishlar davomida Sherobod tumani “Mehnatobod” mahallasida yashovchi fuqaro O.Y. o‘zining ijtimoiy tarmoqdagi sahifasida itning 3 bosh bolasiga nisbatan shafqatsiz munosabatda bo‘lib, ularning quloq qismlarini qo‘l bilan yulib tashlaganligi aks etgan video materialni joylashtirgan.

Holat yuzasidan O‘zbekiston Respublikasi Ma’muriy javobgarlik to‘g‘risidagi kodeksining 111-moddasi 2-qismiga asosan ma’muriy bayonnoma rasmiylashtirilib, hujjatlar sudga yuborilgan.

Sud hukmiga muvofiq, fuqaro O.Y.ga nisbatan 10 kun ma’muriy qamoq jazosi qo‘llanildi.

• Sud
• Surxondaryo
• ma’muriy qamoq