Ijtimoiy tarmoqlarda shaxsi noma’lum fuqarolar tomonidan bo‘rini ushlab, unga nisbatan shafqatsiz munosabatda bo‘linayotgani aks etgan videolar tarqalgan edi.

Mazkur videotasvirlar jamoatchilik orasida keng muhokama va jiddiy rezonansga sabab bo‘lganligi inobatga olinib, bosh boshqarmaning mas’ul davlat inspektorlari tomonidan holat yuzasidan tezkor o‘rganish ishlari olib borilgan.

O‘rganish jarayonida aniqlanishicha, mazkur holat 2025-yil 10-dekabr kuni Uzun tumani “Beshkapa” mahallasi hududida sodir bo‘lgan. Fuqaro M.I. o‘ziga tegishli bo‘lgan mayda shoxli qora mollari (qo‘ylarini) adirlik hududda o‘tlatib yurgan vaqtida bo‘ri hujumiga uchragan. Fuqaro chorva mollarining bir qismini himoya qilish va asrab qolish maqsadida bo‘rini ta’qib qilganini va ushbu holat oqibatida bo‘ri nobud bo‘lganini yozma tushuntirish xatida bayon etgan. Bu haqda Surxondaryo viloyati Ekologiya boshqarmasi matbuot xizmati xabar berdi.

Holat yuzasidan tuzilgan dalolatnoma asosida, fuqaroning harakatlari natijasida O‘zbekiston Respublikasining “Hayvonot dunyosini muhofaza qilish va undan foydalanish to‘g‘risida”gi Qonunining 33-moddasi talablari buzilgani aniqlangan bo‘lib, mazkur qonunning 53-moddasiga muvofiq javobgarlik choralari belgilangan.

Mazkur holat yuzasidan fuqaro M.I.ga nisbatan O‘zbekiston Respublikasi Ma’muriy javobgarlik to‘g‘risidagi kodeksining 90-moddasi 1-qismi  asosida BHMning 20 barobari – 8 million 240 ming so‘m miqdorida  ma’muriy jarima qo‘llanilgan.

“Ma’lumki, bo‘ri O‘zbekiston Respublikasining “Hayvonot dunyosini muhofaza qilish va undan foydalanish to‘g‘risida”gi Qonuni bilan muhofaza qilinadigan yovvoyi hayvon turlaridan biri hisoblanadi. Unga nisbatan shafqatsiz munosabatda bo‘lish, qiynoqqa solish yoki noqonuniy harakatlarni amalga oshirish amaldagi qonunchilikka zid bo‘lib, belgilangan tartibda javobgarlikka sabab bo‘ladi”, – deyiladi xabarda .

• Ekologiya
• Jarima
• Surxondaryo
• fuqaro