Yaqin Sharqdagi so‘nggi voqealar munosabati bilan Qatarda bo‘lib turgan 600 ga yaqin O‘zbekiston fuqarosi orasida jabrlanganlar aniqlanmadi. Bu haqda O‘zbekistonning Dohadagi elchixonasi xabar bermoqda.

Ma’lum qilinishicha, 28-fevral kuni Qatar havo hududining vaqtincha yopilishi oqibatida Toshkentga qaytayotgan 48 nafar o‘zbekistonliklar Doha aeroportida qolib ketgan. Aviakompaniyalar favqulodda vaziyat sabab yo‘lovchilarni mehmonxona bilan ta’minlay olmagan bir sharoitda, elchixona xodimlari zudlik bilan aeroportga yetib borgan. Muzokaralar natijasida fuqarolar, jumladan, ijtimoiy tarmoqlar orqali yordam so‘ragan vatandoshlar vaqtinchalik mehmonxonalarga joylashtirilgan.

“Qatar havo hududi ochilib, parvozlar tiklanishi bilan fuqarolarimizning Vatanga xavfsiz qaytishi ta’minlanadi. Vaziyat elchixonaning doimiy nazoratida bo‘lib, yo‘lovchilar ro‘yxati muntazam yangilab borilmoqda”, – deyiladi xabarda.

Shuningdek, diplomatik vakolatxona o‘zbekistonliklarni vahimaga tushmaslikka, faqat rasmiy manbalarga tayanishga hamda xavfsizlik yuzasidan odamlar gavjum joylardan saqlanib, mahalliy qonun-qoidalarga amal qilishga chaqirgan.

Murojaat uchun elchixona konsuli Otabek Muratov ( +974 5141 1001)bilan bog‘lanish aytilgan.

• Aeroport
• Konsullik
• O‘zbekistonlik
• Qatar
• fuqaro