Tatariston rahbari Rustam Minnixanov 22-23-mart kunlari amaliy tashrif bilan O‘zbekistonda bo‘ladi. Bu haqda Sputnik Rossiyaning O‘zbekistondagi elchixonasiga tayanib xabar bermoqda.

Qayd etilishicha, tashrif doirasida respublikaning qator vazirlik va idoralarida ikki tomonlama muzokaralar o‘tkazilishi kutilyapti.

Shuningdek, Chirchiq kimyo-sanoat texnoparki qurilishiga tamal toshini qo‘yish marosimida ishtirok etish rejalashtirilgan.

“Prezident Shavkat Mirziyoyevning qaroriga asosan Toshkent viloyati hokimligi, “O‘zkimyosanoat” AJ va Tatariston maʼmuriyati o‘rtasida “Ximgrad” AJ (Tatariston) bilan hamkorlikda imzolangan kelishuvlarga binoan tez orada viloyatda “Chirchiq” texnoparki paydo bo‘ladi”, – deyiladi xabarda.

Maʼlum qilinishicha, texnopark “Olmaliq KMK” aksiyadorlik jamiyatining nodir metallar va qattiq qotishmalar ishlab chiqarish ilmiy-ishlab chiqarish birlashmasi va “Maksam-Chirchiq” AJga qarashli 51-sonli metall natriy ishlab chiqarish sexi hududida jihozlanadi. U umumiy maydoni 31,24 gektar bo‘lgan hududda joylashgan bo‘ladi.

• Minnixonov
• O‘zbekiston
• Tatariston