O‘zbekiston Respublikasining Birinchi Prezidenti Islom Abdug‘aniyevich Karimovning rafiqasi Tatyana Akbarovna Karimova joriy yilning 9-iyul kuni bo‘lib o‘tgan prezidentlik saylovida Shavkat Mirziyoyevga ovoz bergani ma’lum bo‘ldi. Buni u o‘z Instagram’dagi sahifasiga joylagan suratdan bilib olish mumkin.

U 10-iyul kuni saylov uchastkasida ovoz berayotgani tasvirlangan suratni bir necha bor ijtimoiy tarmoqdagi sahifasiga joylashtirib, so‘ng yana o‘chirib yubordi.

“Qadrli do'stlarim, afsuski, internetda avvalroq joylagan fotosuratim bilan bog'liq ataylab buzib ko'rsatilgan ma'lumotlar paydo bo'ldi. Mening saylov byulletenimda go'yoki birorta ham nomzod belgilanmagandek ko‘ringan. Shuning uchun men aniqlik kiritishni zarur deb bilaman. Ijtimoiy tarmoqqa joylashda surat sifati yomonlashishi va suratdagi ayrim detallar aniq ko‘rinmasligini hamma yaxshi biladi”,– deb yozadi Karimova xonim.

Shundan keyin, so‘nggi joylagan suratida Tatyana Karimova saylov byulletenida aynan Shavkat Mirziyoyev nomzodi belgilangani aks etgan. Bu orqali Tatyana Karimova Shavkat Mirziyoyev nomzodiga belgi qo‘yganini isbotlashga uringan.

“Mana asl fotosurat, bu mening tanlovimni aniq ko'rsatadi”– deya o‘z harakatiga izoh bergan u.

Ta’kidlab o‘tish kerakki , avvaliga Karimova joylagan aynan shu ko‘rinishdagi suratda u saylov byulletenida hech bir nomzodni belgilamay, uni saylov qutisiga tashlayottgani aks etgan. Oradan vaqt o‘tib, u ushbu suratni o‘chirib yuborgan. Ijtimoiy tarmoqda esa "Tatyana Karimova saylovda hech kimga ovoz bermadi" nomli xabarlar tarqaldi.

Ma’lumot uchun, kelasi oy 75 yoshni qarshilaydigan Tatyana Karimova turmush o‘rtog‘i Islom Karimovning vafotidan keyin Toshkentda yolg‘iz istiqomat qilib kelmoqda. Uning to‘ng‘ich qizi Gulnora Karimova bir qator jinoyatlarda ayblanib, qamoqda saqlanmoqda.

• Gulnora Karimova
• Islom Karimov
• Mirziyoyev