Suriyadagi terroristik tashkilotlar targ‘ibotiga berilib, ularning faoliyatini moliyalashtirgan hamda jangarilar safiga qo‘shilish maqsadida Suriyaga borishga uringan 31 yoshli O‘zbekiston fuqarosi 10 yilga ozodlikdan mahrum qilindi. Bu haqda Davlat xavfsizlik xizmati ma’lum qildi.

1995-yilda Qashqadaryo viloyatida tug‘ilgan fuqaro 2017-yilda Janubiy Koreyadagi nufuzli universitetlardan biriga o‘qishga kirgan. Xorijda tahsil olayotgan vaqtida u ijtimoiy tarmoqlar orqali “jihod”, “hijrat” va “shahidlik”ni targ‘ib qiluvchi audio va videolarni ko‘rgan.

Suriyadagi qurolli to‘qnashuvlar aks etgan materiallar ta’sirida u aqidaparastlik g‘oyalariga berilgan. Keyinchalik Instagram va Telegram orqali Suriyada faoliyat yuritgan “Tavhid va jihod katibasi” hamda “G‘uroba katibasi” kabi terroristik tashkilotlarga aloqador shaxslar bilan muloqot qilgan va ularga oid materiallarni tarqatgan.

Universitetni tamomlagach ham Janubiy Koreyada qolgan fuqaro “G‘uroba katibasi” terroristik tashkilotining media blogeri “Saad Muxtor”ning internet orqali qilgan aldovlariga ishongan va unga pul yuborgan.

2023-yil dekabr oyida O‘zbekistonga qaytgan. 2024-yil iyulida esa Suriyadagi jangarilar safiga qo‘shilish maqsadida Turkiyaga borgan. Biroq rejasi amalga oshmagan va u O‘zbekistonga qaytgan.

Shundan so‘ng huquqni muhofaza qiluvchi organlar tomonidan o‘tkazilgan tezkor tadbir davomida fuqaro qo‘lga olingan va unga nisbatan jinoyat ishi qo‘zg‘atilgan.

Sud uni Jinoyat kodeksining jamoat xavfsizligiga tahdid soluvchi materiallarni tayyorlash, saqlash va tarqatish, taqiqlangan diniy-ekstremistik tashkilotlarda ishtirok etish, terrorchilik faoliyati maqsadida o‘quvdan o‘tish yoki harakatlanish hamda terrorizmni moliyalashtirishga oid moddalarida nazarda tutilgan jinoyatlarni sodir etganlikda aybli deb topdi.

Unga 10 yil muddatga ozodlikdan mahrum qilish jazosi tayinlandi.

Avvalroq Surxondaryo viloyatining Sariosiyo tumanida yashovchi to‘rt nafar fuqaro ham Rossiyada terroristik tashkilotlar g‘oyalarini targ‘ib qilish, taqiqlangan materiallarni tarqatish va terrorchilik faoliyatiga tayyorgarlik ko‘rish bilan bog‘liq jinoyatlarda aybdor deb topilgan. Ularning har biri 8 yil 6 oyga ozodlikdan mahrum qilingan.