16-iyun kuni Tokioda “Garri Potterning yaratilishi” ko‘rgazma-atraksioni ochiladi, u yerga tashrif buyuruvchilar Garri Potter haqidagi filmlarning qayta ishlangan qismlarini tomosha qilishi mumkin.

Ko‘rgazma “Garri Potter”ga bag‘ishlangan dunyodagi eng katta yopiq joy hisoblanadi va uni aylanib chiqish uchun taxminan to‘rt soat kerak bo‘ladi.

Turistlar turli manzaralarni, jumladan, Xogvartsning katta zali, Diagon xiyobonini, taqiqlangan o‘rmon manzarasini va 9 ¾ platformasini ko‘rishi mumkin.

Shuningdek, ko‘rgazmaga tashrif buyurgan insonlar supurgiga minib ko‘rishi, Xogvarts zallarida harakatlanuvchi portretlarni tomosha qilishi, Xogvarts Ekspress poyezdiga o‘tirishi, kviddich o‘ynashi va esdalik sovg‘alarni sotib olishi ham mumkin.

Ko‘rgazmaga tashrif buyuruvchilar dunyodagi eng katta “Garri Potter”ga bag‘ishlangan do‘kondan tashqari, Britaniya taomlari sotiladigan turli restoran va kafelarga bora oladi. Masalan, ovqatlanish joylarida baliq, qovurilgan kartoshka va mol go‘shti, inglizcha nonushta, tushdan keyin choy ichsa bo‘ladi.

Ko‘rgazma chiptalarini 22-martdan boshlab xarid qilish mumkin. Chipta narxlari kattalar uchun 48 dollar, kattalar bilan kelgan 12-17 yoshli o‘smirlar uchun 39 dollar, bolalar uchun esa 29 dollarni tashkil qiladi.

• Kino
• muzey
• qiziqarli