Qosim-Jo‘mart To‘qayev prezidentlik muddati tugashidan oldin har qanday mukofotlarni olishdan bosh tortdi. Bu haqda Qozog‘iston prezidentining Matbuot xizmati maʼlum qildi.

Xuddi shu sababga ko‘ra, u Rossiya tomoni bir kun avval unga topshirishni taklif qilgan “Aleksandr Nevskiy” ordenini qabul qilishdan bosh tortgan. Bu haqda avvalroq siyosatshunos Yerbol Edilov o‘zining Telegram-kanalida ham maʼlum qilgan edi.

Edilovning yozishicha, xuddi shunday voqea yaqinda Bishkekka tashrifi chog‘ida ham sodir bo‘lgan. Yaʼni Qozog‘iston prezidenti Qirg‘izistonning birinchi darajali oliy davlat mukofoti – “Manas”dan bosh tortgan. Buni Tokayevning matbuot kotibi Ruslan Jeldibay ham tasdiqlagan.

Ayrim manbalarning yozishicha, bu tartib ham Qozog‘iston, ham xorijiy davlatlar ordenlariga taalluqli.

Hozircha To‘qayevning “Aleksandr Nevskiy” ordenini qabul qilmaganini Kreml tasdiqlamagan. Bir kun oldin esa To‘qayev Sankt-Peterburgdagi xalqaro iqtisodiy forumida ishtirok etgan va undan Donbass respublikalarini alohida mamlakat sifatida tan olish imkoniyatlari haqida so‘raganida Qozog‘iston DXR va LXRni tan olmasligini aytgan edi. 

• Orden
• Qozog‘iston
• Rossiya
• To'qayev