Ўзбекистоннинг Екатеринбург шаҳридаги Бош консулхонаси оғир вазиятга тушиб қолган юртдошларига амалий ёрдам кўрсатиш ҳамда уларнинг ҳуқуқ ва қонуний манфаатларини ҳимоя қилиш ишларини давом эттирмоқда.

Бош консулхонага Навоий вилоятида туғилган О.В.нинг бир неча кундан буён тураржойсиз қолгани ва яшаш учун зарур шароитлар йўқлиги сабабли кўчада тунашга мажбур бўлаётгани ҳақида хабар келиб тушган.

Мурожаат дипломатлар томонидан зудлик билан ўрганилиб, ватандош билан Бош консулхонада суҳбат ўтказилди. Унинг шахси ва юзага келган ҳолатлар аниқлангач, консуллик ходимлари фуқаронинг яқинлари билан боғланди.

Шундан сўнг ватандошни доимий яшаш жойига хавфсиз қайтариш чоралари кўрилди. Бош консулхона кўмагида Екатеринбург–Тошкент йўналиши бўйича авиачипта харид қилиниб, фуқаронинг Ўзбекистонга хавфсиз қайтиши таъминланди.